Kolesnikova DWʼga bergan intervyusida Yevropa davlatlari AQShdan oʻrnak olib, diplomatiya va sanksiyalardan Belarusdagi siyosiy mahbuslar hayotini saqlab qolish vositasi sifatida foydalanishi zarurligini bildirdi.
U soʻnggi paytlarda muloqot zarurati haqida koʻproq gapirayotgani Aleksandr Lukashenko rejimiga munosabati yumshaganini anglatmasligini taʼkidladi. Faolning aytishicha, qamoqda oʻtkazgan yillari uning tizimga munosabatini oʻzgartirmagan.
«Biz hozir siz bilan suhbatlashyapmiz, chunki aynan diplomatiya taʼsir oʻtkazish va muayyan maqsadlarga erishish vositasi sifatida ishga solingan», - dedi Kolesnikova.
U oʻzining ozodlikka chiqishini diplomatik muzokaralar samara berishiga misol sifatida keltirdi.
«AQShning muzokaralar yoʻli ish berdi»
Kolesnikova Belarus qamoqxonalarida siyosiy sabablarga koʻra hukm qilingan 800 dan ortiq kishi qolayotganini eslatdi.
«Agar AQShning muzokaralar yoʻli ish berganini koʻrib turgan boʻlsak, demak, undan foydalanish kerak», - dedi u.
DW maʼlumotiga koʻra, Vashington va Minsk oʻrtasidagi muzokaralar natijasida Belarus kompaniyalariga nisbatan sanksiyalarni yumshatish evaziga qariyb 500 siyosiy mahbus ozod qilingan.
Kolesnikova Yevropa Ittifoqini ham shu kabi yondashuvdan foydalanishga chaqirdi.
Yevropaning ochiqligi Rossiya taʼsirini kamaytirishi mumkin
Faol Yevropa bilan aloqalarning kengayishini Belarusning kelajagi va mintaqaviy xavfsizlik bilan ham bogʻladi.
«Yevropaning rejim uchun emas, Belarus va belaruslar uchun ochiqligi mamlakatda Rossiya taʼsir doirasini qisqartirishi mumkin», - dedi u.
Kolesnikova buni Yevropa xavfsizligi tizimi uchun muhim maqsad sifatida baholadi.
U Polsha tashqi ishlar vaziri Radoslav Sikorskiyning Belarus tashqi ishlar vaziri Maksim Rijenkov bilan yaqinda oʻtkazgan muzokaralarini ham alohida tilga oldi. Uchrashuv Nyu-Yorkda BMT Bosh Assambleyasining 81-sessiyasi doirasida boʻlib oʻtgan.
