Mahalla xodimlarini ishdan bo‘shatish tuman kengashi raisining birinchi o‘rinbosari vakolatiga kiritildi

Respublika mahallalar kengashi xodimlariga Toshkent shahri va Toshkent viloyatida doimiy propiska qilish huquqi berilmoqda. Bu haqda «Aholi muammolari bilan ishlashda mahalla institutining mavqeini oshirish chora-tadbirlari to‘g‘risida»gi Prezident Farmoni ijrosiga bag‘ishlangan brifingda ma'lumot berildi.

2019 yil 2 aprel kuni jamiyatning milliy boshqaruv idorasi bo‘lgan mahalla institutni har tomonlama rivojlantirishni nazarda tutuvchi Prezident Farmoni qabul qilingan edi.

Mazkur yuridik hujjat asosida mahallalar faoliyatida kutilayotgan o‘zgarishlar yuzasidan Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi boshqaruv raisi Shavkat Javlonov ma'lumot berdi, deya qayd etadi Kun.uz muxbiri.

«Mahalla fuqarolar yig‘inlari raislari va mas'ul kotiblarining oylik ish haqi fondi joriy yilda bir yarim baravarga oshiriladi hamda mahalla kengashi xodimlarini poytaxt va Toshkent viloyatida doimiy propiskadan o‘tkazish huquqi beriladi», — deydi Shavkat Javlonov.

Kengash boshqaruv raisiga ko‘ra, endilikda mahalla fuqarolar yig‘inlarining faoliyati 12 mezon asosida nazorat qilinib, baholab boriladi. Belgilangan talabga javob bergan yig‘inlarga ish haqining 0,5 baravaridan 5 baravarigacha ustama haqi to‘lanishi rejalashtirilgan.

Ma'lum qilinishicha, o‘tgan yillar davomida mahalla fuqarolar yig‘inlari faoliyatiga mahalliy hokimiyat vakillarining asossiz aralashuvi kuzatilgan. Xususan, 50-60 foiz mahallalarda yig‘in uchun ajratilgan binoning hokimiyat tomonidan olib qo‘yilishi va talabga javob bermaydigan joyga ko‘chirilishi, rais va o‘rinbosarlarning hech bir sababsiz ishdan olinishi holatlari qayd etilgan.

Shu bois yangi tartibga ko‘ra, joriy yilnning 1 iyun sanasidan boshlab fuqarolar yig‘inlari xodimlari bilan mehnat shartnomalarini tuzish va bekor qilish fuqarolarning o‘zini o‘zi boshqarish organlari faoliyatini muvofiqlashtirish bo‘yicha tuman/shahar kengashlari raislarining birinchi o‘rinbosarlari tomonidan amalga oshirilishi kutilmoqda.

Shuningdek, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga fuqarolar yig‘inlari tomonidan foydalanib kelinayotgan davlat mulki bo‘lgan binolarni biriktirilgan yer maydonlari bilan birgalikda hatlovdan o‘tkazish, ularni belgilangan tartibda fuqarolar yig‘inlariga mulk huquqi bilan berilishini hamda har chorakda tasdiqlangan grafik asosida hududiy «Mahalla markazi» majmualari va namunaviy loyihalar asosida fuqarolar yig‘inlari binolarini qurish, rekonstruksiya qilish, ta'mirlash holati to‘g‘risida axborot berib borish topshirildi.

Eslatib o‘tamiz, hozirda butun respublika bo‘ylab may oyida bo‘lib o‘tadigan mahalla fuqarolari yig‘inlari raisi va o‘rinbosarlari uchun saylovga tayyorgarlik jarayoni ketmoqda. Oliy majlis Senati raisi Nig‘matilla Yo‘ldoshev saylov kampaniyasi masalasida o‘tkazilgan videoselektorda saylov ishlari talab darajasida yo‘lga qo‘yilmagani, deyarli barcha hududlarda saylov bevosita o‘tkaziladigan manzil va obektlar ro‘yxatini shakllantirishda sustkashlik qilinayotganini tanqid qilgan edi.