«Atletiko» hujumchisi Antuan Grizmanning «Barselona»ga transferi amalga oshmasligi mumkin.
Diario sport xabariga ko‘ra, Kataloniya klubi futbolchilari Antuan haqidagi yangiliklardan xursand emas. «Barsa» o‘yinchilari rahbariyatga o‘z pozitsiyalarini ma'lum qilishgan: garchi transfer bo‘yicha qarorni rahbariyat qabul qilsa-da, futbolchilar bunga qarshi ekanliklarini bildirishgan.
«Ko‘k-anorranglilar»ning qarshiligi birinchi navbatda Grizmanning o‘tgan yilgi rad javobi bilan bog‘liq. Klub uni o‘tgan yozda ham o‘z tarkibiga qo‘shib olmoqchi bo‘lgan, ammo fransiyalik hujumchi rad javobini berib, buni shouga aylantirib yuborgandi. Uning «Qaror» hujjatli filmidagi harakatlarini muxlislar va «Barselona»dagilar ushbu klubga nisbatan hurmatsizlik deb baholashgan. Boz ustiga, u shundan so‘ng «Atletiko» bilan shartnomasini uzaytirgan ham.
Qolaversa, Lionel Messi Grizmann bilan telefon orqali suhbatlashgani haqidagi xabarlar noto‘g‘ri ekaniga jamoadoshlarini ishontirgan.
Qo‘shimcha qilinishicha, Ispaniya chempioni safidagi yetakchi futbolchilar Antuanni futbolchi-kadr sifatida ham qabul qilishmayapti. Ular tarkibda Grizmannga joy yo‘q, deb hisoblashmoqda.
«Bundan tashqari, u shamol qayerga esishiga qarab o‘z fikrini o‘zgartiradigan buqalamun hamdir», – degan «Barselona» futbolchilaridan birining so‘zlarini keltirgan nashr.
Klub rahbariyatining mazkur masaladagi qarori hozircha noma'lum. Aprel oyi o‘rtalarida «Barselona» prezidenti Xosep Mariya Bartomeu bu haqdagi mish-mishlarga quyidagicha munosabat bildirgandi.
«Oxirgi so‘zni doimo futbolchining o‘zi aytadi. Buyuk o‘yinchilar ulkan klublarda o‘ynaydilar, transfer qilish uchun ularni ko‘ndirish kerak bo‘ladi.
«Barselona» futbolchilari bilan Grizmann haqida gaplashganim yo‘q. Biz bu borada «Atletiko» bilan muzokara o‘tkazmayapmiz. Grizmann va uning atrofidagilardan ham hozircha hech qanday xat-xabar bo‘lgani yo‘q», – degandi Bartomeu.
