O‘zbekiston Respublikasi Energetika vazirligida Osiyo taraqqiyot banki (OTB) delegatsiyasi bilan uchrashuv bo‘lib o‘tdi. Unda MOMIH (Markaziy Osiyo mamlakatlari iqtisodiy hamkorligi) va mintaqa davlatlari energetika vazirlarining sentabr oyida Toshkent shahrida bo‘lib o‘tadigan muloqotiga tayyorgarlik ko‘rish masalalari muhokama etildi.
O‘zbekiston Respublikasi Energetika vazirligi matbuot xizmati xabariga ko‘ra, uchrashuvda Osiyo taraqqiyot banki O‘zbekiston Respublikasining energetika sohasidagi o‘zgarishlarga alohida e'tibor qaratayotgani va bu jarayonda faol ishtirok etayotgani, buning yorqin misoli sifatida joriy yilning 20-21 sentyabrida O‘zbekiston poytaxtida MOMIH mamlakatlari energetika vazirlari muloqoti va MOMIH Energetika investitsion forumi o‘tkazilayotgani ta'kidlab o‘tildi.
Markaziy Osiyo mintaqasida iqtisodiy hamkorlik (MOMIH) dasturi Osiyo taraqqiyot banki (OTB)ning tashabbusi bilan 1997 yilda ishga tushirilgan.
Hozirgi vaqtda MOMIHda mintaqaning 11 mamlakati - O‘zbekiston, Xitoy, Ozarboyjon, Qozog‘iston, Qirg‘iziston, Mo‘g‘iliston, Tojikiston, Afg‘oniston (2005 yildan beri), Pokiston, Turkmaniston (2010 yildan boshlab) va Gruziya (2016 yildan boshlab), shuningdek, xalqaro donor tashkilotlar: OTB, Jahon banki, YeTTB, XVF, BMT Taraqqiyot dasturi, Islom taraqqiyot banki ishtirok etmoqda.
Shu munosabat bilan birinchi marta o‘tkazilayotgan MOMIH energetika vazirlarining mintaqaviy muloqoti o‘zida mamlakatlar va kompaniyalarni birlashtirgani hamda ushbu hududning energetik xavfsizligini ta'minlashga xizmat qilish bilan muhim ahamiyatga ega.
Ishonchli elektr ta'minoti aholi farovonligi uchun zarur bo‘lish bilan birga, zamonaviy iqtisodiyotning asosini tashkil etadi. Va ushbu maqsadga erishish MOMIH energetika vazirlarining umumiy vazifasi hisoblanadi.
Sentabr forumi doirasida energetika sohasidagi dolzarb masalalarni hal etish uchun mintaqaviy hamkorlik imkoniyatlarini muhokama qilish ko‘zda tutilgan. Tadbir mavzusi bo‘yicha Xalqaro energetika agentligi (XEA), Xalqaro energetika kengashi, dunyoning yetakchi kompaniyalari rahbarlarining chiqishlari rejalashtirilgan.
Hukumatlararo muloqotning birinchi kunida energetika vazirlarining deklaratsiyasini qabul qilish va imzolash kutilmoqda.
Kunning ikkinchi yarmida Energetika investitsion forumi (EIF) o‘z ishini boshlaydi. Mutaxassislar unda biznesni energetika, xususan, Markaziy Osiyo energetika bozorlariga jalb etish masalalarini muhokama etadilar.
