Davlat soliq qo‘mitasining doimiy yangilanadigan ma'lumotlar bazasi yaratiladi

O‘zbekiston Respublikasi prezidentining «Soliq ma'muriyatchiligini takomillashtirish bo‘yicha qo‘shimcha chora-tadbirlar to‘g‘risida»gi qarori qabul qilindi.

Prezidentning mazkur qarorida «Soliq ma'muriyatchiligini takomillashtirish strategiyasini amalga oshirish bo‘yicha «yo‘l xaritasi» ma'qullangan. Chora-tadbirlarni amalga oshirish mexanizmlari, ijro muddati va mas'ullar belgilangan.

«Yo‘l xaritasi»ning ikkinchi bobi — «Xizmat ko‘rsatishga yo‘naltirilgan soliq xizmatlarini rivojlantirish chora-tadbirlari» orasidan quyidagilar o‘rin olgan:

·        Soliq xizmatlarini ko‘rsatish bo‘yicha mobil ilovalar sonini ko‘paytirish (o‘zini o‘zi ish band qilgan fuqarolarning ro‘yxatdan mustaqil o‘tishi va soliqlarni to‘lashi, yuridik shaxsning ulushi bo‘yicha qo‘yilgan taqiqlar (band solingan) haqidagi ma'lumotnomalarni olish, yakka tartibdagi tadbirkor maqomini tekshirish va boshqalar).

·        Soliq solish maqsadida yer va ko‘chmas mulkning kadastr hisobi va qiymatini baholash bilan to‘liq qamrab olishni ta'minlash chora-tadbirlarini amalga oshirish uchun kadastr va soliq organlari ma'lumotlar bazalarini integratsiyalashtirish.

·        Soliq to‘lovchilarga xizmat ko‘rsatish bo‘yicha soliq organlarining ayrim funksiyalarini nodavlat tashkilotlarga (autsorsing) o‘tkazish bo‘yicha takliflar tayyorlash.

·        Daromad solig‘i va mol-mulk solig‘ini to‘lash muddatlarini va ma'lumotnomalar taqdim etish tizimini qayta ko‘rib chiqish.

·        Ko‘rsatiladigan soliq xizmatlari sifatiga soliq to‘lovchilarning qoniqish darajasini anonim baholash imkoniyatini yaratish uchun Davlat soliq qo‘mitasining rasmiy veb-saytida qo‘shimcha funksiyalar kiritish.

·        Soliq organlari bo‘linmalari faoliyatining samaradorligini jamoatchilik fikri natijalarini hisobga olgan holda reyting baholashni joriy etish.

·        Soliq to‘lovchilarning aniq ehtiyojlaridan kelib chiqib (to‘liq maslahat berish, buyurtmanomalar, ariza va shikoyatlar qabul qilish), «call-markaz» funksiyalarini kengaytirish orqali soliq to‘lovchilarga xizmatlar ko‘rsatish, shuningdek, soliq ma'muriyatchiligini yaxshilashga doir takliflarni ishlab chiqish borasidagi dolzarb muammolarni chuqur tahlil qilish uchun ko‘p beriladigan savollar va kelib tushadigan murojaatlar asosida Davlat soliq qo‘mitasining doimiy yangilanadigan ma'lumotlar bazasini yaratish.

·        O‘zbekiston Soliq maslahatchilari palatasini soliq maslahatchilari tashkilotlarining unga majburiy a'zo bo‘lishini nazarda tutuvchi o‘zini o‘zi nazorat qiladigan tashkilotga aylantirish, soliq maslahatchilarini o‘qitishni tashkil qilish, malaka imtihonlarini o‘tkazish va sertifikat berish vazifalarini topshirish orqali uning faoliyatini takomillashtirish.