Abdulaziz Komilov AQSh davlat kotibi o‘rinbosari bilan muzokaralar o‘tkazdi

2019 yilning 22 avgust kuni O‘zbekiston Respublikasi tashqi ishlar vaziri Abdulaziz Komilov mamlakatga amaliy tashrif bilan kelgan AQSh davlat kotibining siyosiy masalalar bo‘yicha o‘rinbosari Devid Xeylni qabul qildi.

TIV xabariga ko‘ra, uchrashuvda ikki tomonlama munosabatlar, ko‘p tomonlama tuzilmalar doirasidagi hamkorlik, shuningdek, xalqaro va mintaqaviy ahamiyatga molik muammolar yuzasidan fikr almashildi.

Tomonlar bugungi kunda ko‘p qirrali O‘zbekiston-AQSh munosabatlari jo‘shqin rivojlanayotganini mamnuniyat bilan qayd etdilar. Bunga turli darajadagi faol muloqotlar yo‘l ochdi. O‘zbekiston Respublikasi prezidenti Shavkat Mirziyoyevning o‘tgan yil may oyida Vashington shahriga rasmiy tashrifi va prezident Donald Tramp hamda AQSh ma'muriyatining yuqori martabali a'zolari bilan bo‘lib o‘tgan muzokaralar hal qiluvchi voqea bo‘ldi.

AQSh bilan investitsiya, mamlakatni iqtisodiy va texnologik modernizatsiya qilish uchun texnologiyalar va ilg‘or AQSh tajribasini jalb qilishdir sohasida yaqin hamkorlik O‘zbekiston uchun muhim ustuvor yo‘nalish ekanligi ta'kidlandi.

Uchrashuvda madaniy-gumanitar sohadagi konstruktiv aloqalarni chuqurlashtirish istiqbollariga alohida e'tibor qaratildi.

Tomonlar O‘zbekiston va AQSh o‘rtasidagi o‘zaro manfaatli barcha sohalarda munosabatlarni mustahkamlash va kengaytirishga qat'iy sodiq ekanliklarini yana bir bor tasdiqladilar.

Devid Xeyl O‘zbekistonda amalga oshirilayotgan keng qamrovli islohotlarni yuksak baholadi va qo‘shma loyihalarni amalga oshirishda, shu jumladan ta'lim almashuvini faollashtirishda ko‘mak berishga AQSh tomoni tayyorligini tasdiqladi.

Yig‘ilishda kun tartibidagi boshqa masalalar ham ko‘rib chiqildi. Muzokaralarda AQSh elchisi Daniel Rozenblyum ishtirok etgan.

Bundan oldin, AQSh davlat kotibining siyosiy masalalar bo‘yicha o‘rinbosari Devid Xeyl O‘zbekistonga kelishi xabar qilingandi.