Qishloq xo‘jaligi vazirligi tizimida «Oliy maktab»lar tashkil etiladi

Vazirlar Mahkamasining “Qishloq xo‘jaligi vazirligi tizimida “Oliy maktab”lar faoliyatini tashkil etish chora-tadbirlari to‘g‘risida”gi qarori loyihasi muhokama uchun e'lon qilindi.

O‘zbekiston Respublikasi Qishloq xo‘jaligi vazirligi, Oliy va o‘rta maxsus ta'lim vazirligining taklifiga muvofiq Toshkent davlat agrar universiteti akademik litseyi hamda O‘zbekiston Respublikasi Qishloq xo‘jaligi vazirligi tizimiga o‘tkazilayotgan qishloq xo‘jaligi kasb-hunar kollejlari negizida oliy ta'lim tizimi bilan integratsiyalashgan oliy maktablar tashkil etish to‘g‘risidagi takliflariga rozilik berilishi mumkin.

Quyidagilar Oliy maktablarning asosiy vazifalari etib belgilanadi:

qishloq xo‘jaligini rivojlantirishning 2030 yillargacha mo‘ljallangan strategiyasida soha va uning tarmoqlarida yaqin istiqbolda va kelajakda amalga oshiriladigan vazifalar, joriy qilinadigan zamonaviy texnologiyalarni hisobga olgan holda nazariy bilim va amaliy ko‘nikmalarni puxta egallagan malakali va raqobatbardosh kadrlar tayyorlash;

ilg‘or xorijiy tajriba hamda professional ta'lim tizimi oldiga qo‘yilayotgan vazifalar asosida o‘quvchilarni innovatsion va yangicha fikrlashga yo‘naltiradigan zamonaviy pedagogik va axborot texnologiyalardan samarali foydalangan holda sifat jihatdan yangi ta'lim standartlari, dasturlar va o‘quv rejalarni, o‘quvchilarning mustaqil izlanishini ta'minlovchi mexanizmlarni keng joriy etish;

qishloq xo‘jaligi va uning tarmoqlari uchun kadrlar tayyorlashning uzviy tizimini yaratish, Oliy maktab hamda Toshkent davlat agrar universiteti va uning filiallari o‘rtasida ta'lim dasturlarining uzluksizligi va izchilligini ta'minlash;

xalqaro tasniflagichni kamida 3 yoki 4-darajasiga mos ta'lim dasturlarini tamomlagan kamida umumiy o‘rta ma'lumotga ega bo‘lgan shaxslar hisobidan shakllantirilgan guruhlarda kasblar va mutaxassisliklarning murakkabligidan kelib chiqqan holda ikki yildan kam bo‘lmagan muddatda kunduzgi, kechki va sirtqi ta'lim shakllarida davlat buyurtmasi hamda to‘lov kontrakt asosida o‘qitish;

o‘quv-laboratoriya bazasini modernizatsiyalash, fan dasturlarida qishloq xo‘jaligini raqamlashtirish, soha bo‘yicha zamonaviy ishlab chiqarish jarayonlari, yuqori unumli va resurstejamkor ilg‘or texnologiyalar bo‘yicha nazariy bilim, ko‘nikma va malakalarni shakllantirish;

xorijiy ilmiy-tadqiqot va oliy ta'lim muassasalarida professor-o‘qituvchilar va ilmiy-pedagog kadrlarning malakasini oshirish va stajirovkalarini tashkil etish;

professor-o‘qituvchilar, ilmiy-tadqiqotchilar, iqtidorli o‘quvchilarning innovatsion texnologiyalarni yaratish hamda joriy etish borasidagi tashabbuskorligi va moddiy manfaatdorligini oshirish mulkchilik shaklidan qat'iy nazar qishloq xo‘jaligi mahsulotlarini yetishtirish, saqlash, qayta ishlash va logistikasi bilan shug‘ullanuvchi xo‘jalik yurituvchi sub'yektlarga axborot-maslahat (extension) xizmatlarini ko‘rsatish;

tanlab olingan kasb-hunar bo‘yicha bir yoki bir necha ixtisoslikni egallash jarayonida o‘quvchilarning kasbiy layoqat, ko‘nikma va malakalarini rivojlantirish, ilg‘or texnologiyalar asosida faoliyat yuritayotgan xo‘jalik sub'yektlariga ularning amaliyotlarini tashkil qilish;

o‘rta maxsus, kasb-hunar ta'limi darajasida kunduzgi, kechki va sirtqi ta'lim shakllarida oliy ta'limning bakalavriat ta'lim yo‘nalishlari bilan integratsiyalashgan kichik bakalavrlar (associate degree) tayyorlash;

fan, ta'lim va ishlab chiqarishning samarali integratsiyalashuvini ta'minlash;

o‘quvchilarni vatanparvarlik va fidoyilikni shakllantiruvchi milliy o‘zlikni anglash, xalqning milliy madaniy tarixiy an'analariga hurmat, vatan bilan g‘ururlanish ruhida tarbiyalash;

sog‘lom turmush tarzi me'yorlarini tatbiq qilish, ta'lim-tarbiya jarayonini sog‘lomlashtirish uchun sharoitlar yaratish.

Belgilanishicha:

Oliy maktablarga Xalqaro tasniflagich bo‘yicha asosiy ta'lim dasturlaridan tashqari quyi darajadagi ta'lim dasturlari bo‘yicha kadrlar tayyorlash huquqi beriladi;

Kichik bakalavr (Associate degree) ta'lim dasturlarini tamomlagan bitiruvchilar 2023/2024 o‘quv yilidan boshlab mos bakalavriat ta'lim yo‘nalishlari bo‘yicha Oliy maktabni muvaffaqiyatli yakunlagan bitiruvchilar, kirish sinovlarisiz suhbat o‘tkazish orqali bakalavrlar tayyorlashning maxsus uch yillik dasturi bo‘yicha va o‘qish tugaganidan so‘ng taqsimotga muvofiq uch yil davomida uzluksiz ishlab berish majburiyatini olgan holda Toshkent davlat agrar universiteti va uning filiallariga o‘qishga kirish huquqiga ega bo‘ladi;

Oliy maktab O‘zbekiston Respublikasi Qishloq xo‘jaligi vazirligining yuridik shaxs maqomiga ega bo‘lgan tarkibiy bo‘linmasi hisoblanib, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga va blankalarga, mustaqil balansga hamda O‘zbekiston Respublikasi Moliya vazirligining G‘aznachiligida zarur shaxsiy hisob varaqlariga ega bo‘ladi;

Oliy maktablar direktorlari Toshkent davlat agrar universiteti tavsiyasiga ko‘ra O‘zbekiston Respublikasi Qishloq xo‘jaligi vazirligi tomonidan tayinlanadi.

O‘quvchilarni qabul qilish parametrlari 2020/2021 o‘quv yilidan boshlab kadrlar buyurtmachilari bo‘lgan davlat va xo‘jalik boshqaruvi organlari, xo‘jalik birlashmalari, yirik korxonalar takliflari asosida O‘zbekiston Respublikasi Qishloq xo‘jaligi vazirligi tomonidan Oliy va o‘rta maxsus ta'lim vazirligi bilan kelishilgan holda tasdiqlanadi.

Oliy maktabning faoliyatini moliyalashtirish manbalari etib quyidagilar belgilanadi:

O‘zbekiston Respublikasi Davlat budjeti mablag‘lari;

O‘zbekiston Respublikasi Qishloq xo‘jaligi vazirligi;

O‘quvchilarni to‘lov-kontrakt asosida o‘qitishdan tushadigan mablag‘lar;

Yirik ish beruvchilar hamda buyurtmachilarning budjetdan tashqari mablag‘lari;

xalqaro moliya institutlarining mablag‘lari;

xo‘jalik faoliyatidan va shartnoma asosida xizmatlar ko‘rsatishdan tushadigan tushumlar;

jismoniy va yuridik shaxslarning xomiylik xayriyalari;

qonun hujjatlarida taqiqlanmagan boshqa manbalar.