O‘zbekistonning Vladivostok shahridagi (Rossiya) Bosh konsulxonasi bergan ma'lumotga ko‘ra, 2020 yilda Primore o‘lkasi hududida patent asosida ishlaydigan chet ellik ishchilardan transport sohasida foydalanishga taqiq qo‘yiladi. Tegishli qaror gubernator Oleg Kojyemyako tomonidan 2019 yil 12 sentabr kuni imzolandi.
Hujjatga ko‘ra, chet ellik fuqarolarning shahar ichida va shahar atrofiga qatnaydigan avtobuslar, tramvay, trolleybus va taksi haydovchisi sifatida ishlashlari taqiqlanadi. Sayyohlik va ekskursiya yo‘nalishlari bo‘yicha faoliyat yuritadigan ijaraga olingan avtobus haydovchilari bundan mustasno.
Shu munosabat bilan Konsullik-huquqiy departamenti Rossiya hududida bo‘lib turgan va Primore o‘lkasiga borishni rejalashtirayotgan fuqarolarga yuqorida ko‘rsatilgan taqiqlarni hisobga olishlarini so‘ragan.
Konsullik-huquqiy departamenti Rossiyaning Uzoq Sharq federal okrugi (Amur oblasti, Kamchatka o‘lkasi, Magadan oblasti, Primore o‘lkasi, Saxa Respublikasi (Yoqutiston), Saxalin oblasti, Yahudiy avtonom viloyati, Xabarovsk o‘lkasi, Chukotka avtonom okrugi) hududidagi O‘zbekiston fuqarolari zarur hollarda mamlakatning Vladivostok shahridagi Bosh konsulxonasiga quyidagi telefon raqamlari orqali murojaat qilishlari mumkinligini eslatadi: +7-423-260-48-00, +7-951-018-70-07.
