Xitoy - Tojikiston - O‘zbekiston xalqaro avtomobil yo‘lagini ochish bo‘yicha ishlar kuchaytiriladi

Toshkentda O‘zbekiston – Xitoy hukumatlararo hamkorlik qo‘mitasining Savdo-iqtisodiy hamkorlik bo‘yicha kichik qo‘mitasi 6-majlisi bo‘lib o‘tdi. 

Tomonlar O‘zbekiston Respublikasi va Xitoy o‘rtasida 2017 yilda imzolangan xalqaro avtomobil transporti to‘g‘risidagi hukumatlararo bitim bajarilishini yanada rag‘batlantirish lozimligi, avtomobilda yuk tashuvlari rentabelligini oshirish borasida «Toshkent-Andijon-O‘sh-Qashg‘ar» avtomobil koridori imkoniyatlaridan to‘liq foydalanish muhimligini qayd etib o‘tishdi. 

Shuningdek, «Irkeshtom» va «Xorgos» (XXR) chegara bojxona postlarining hafta davomida dam olish kunlarisiz faoliyat ko‘rsatishini tashkil etish, paritet asosida yuk avtomobillari haydovchilariga ko‘p marotabali vizalar berish, Xitoy-Tojikiston-O‘zbekiston xalqaro avtomobil yo‘lagini ochish yuzasidan hamkorlikdagi ishlarni yanada kuchaytirish kabi masalalar muhokama etildi.

Fuqaro aviatsiyasi sohasida hamkorlik natijalarini faol ravishda kuchaytirish maqsadida tomonlar 2020 yilda ikki mamlakat aviatsiya ma'murlari o‘rtasida maslahatlashuvlar o‘tkazish, aviatsiya to‘g‘risidagi kelishuvlarni yanada kengaytirish, shuningdek, temir yo‘l sohasida konteyner tashuvlarini rivojlantirish, o‘zaro foydali koridorlarni yaratish, tariflarning shakllantirilishi bilan bog‘liq masalalarni muhokama qilish maqsadida Xitoy milliy temir yo‘l operatori, «O‘zbekiston temir yo‘llari» AJ va boshqa tegishli vazirlik va idoralar bilan hamkorlikda uchrashuv o‘tkazishga kelishib olindi.