«Bugun barcha masalalarni davlatning o‘zi hal qila olmaydi» - Sodiq Safoyev ijtimoiy muammolar haqida

8 noyabr kuni O‘zbekiston Respublikasi Oliy Majlisi Senati Raisining birinchi o‘rinbosari Sodiq Safoyev ishtirokida Toshkent davlat iqtisodiyot universitetida O‘zbekiston Respublikasi Oliy Majlisi Senati va Kapital bozorini rivojlantirish agentligi tomonidan tashkil etilgan ijtimoiy investitsiyalar kiritish sohasida davlat va xususiy sektor hamkorligiga bag‘ishlangan davra suhbati bo‘lib o‘tdi.

Tadbirda AQSh Kolumbiya universitetining xalqaro va ijtimoiy munosabatlar sohasidagi amaliyotchi professori, Nyu-York shahridagi «Picker Center» rahbar kadrlar tayyorlash markazi asoschisi va direktori Uilyam Eymike boshchiligidagi delegatsiya vakillari ishtirok etdi.

Sodiq Safoyev tomonidan ochilgan yig‘ilishda qatnashchilar va xorijlik mehmonlar tanishtirib o‘tildi va ijtimoiy muammolar bo‘yicha fikr bildirdi.

«Bugungi uchrashuvimizdan maqsad ijtimoiy investitsiyalarning tizimini rivojlantirish, davlat-xususiy hamkorligini kengaytirishdan iborat. Bizda bu masalada qonun qabul qilindi. Lekin bu qonun to‘laqonli ishlab ketdi, deb ayta olmaymiz. Hozirda muammolar bor. Ularni birgalikda tahlil qilishimiz kerak. Ijtimoiy investitsiyalar va davlat-xususiy hamkorlik masalalari notenglik, qashshoqlikka qarshi kurash, oziq-ovqat xavfsizligi, korrupsiyani yo‘q qilish, sog‘liqni saqlash tizimi, ta'lim, shu jumladan, oliy ta'lim tizimini rivojlantirish eng asosiy vazifalaridan hisoblanadi.

Jamiyatning taraqqiyoti shuni ko‘rsatyaptiki, bugun davlatning bir o‘zi barcha masalalarni hal qila olmaydi. Bu yerda xususiy sektor hamda fuqarolik jamiyatini jalb etish kerak. Buning usuli aynan ijtimoiy investitsiyalar, davlat-xususiy sherikchiligi rivojlantirishdir», — dedi Sodiq Safoyev.

Tadbir ishtirokchilari ijtimoiy investitsiyalar jamiyatdagi ayrim eng murakkab vazifalarni hal etishning yangi usuli ekanligini ta'kidladi. Garchi hozirgi vaqtdagi ko‘pchilik muammolar, jumladan ijtimoiy notenglik, arzon uy-joy yetishmasligi, korrupsiya, sog‘liqni saqlash yetarli darajada rivojlanmaganligi, oziq-ovqat xavfsizligi masalasi hal etilmaganligi juda katta va juda murakkab muammo bo‘lib tuyulishi mumkin bo‘lsa-da, ularning yechimi bor va bunga davlat va xususiy sektor, shuningdek xayriya jamg‘armalari hamkorligi evaziga erishish mumkinligi tilga olindi.