Boliviya prezidenti Evo Morales prezidentlik saylovlari natijalarini soxtalashtirishda ayblanib, ommaviy namoyishlar boshlanishi fonida iste'foga chiqdi. Boliviya armiyasi qo‘mondoni va politsiya rahbari prezidentni lavozimini tark etishga chaqirgandi. Vitse-prezident Alvaro Garsia Linera ham iste'foga chiqqan.
«Biz yutqazgan partiyalar tarafdorlari uyushtirayotgan zo‘ravonlik va tajovuzni boshdan kechirayotganimiz og‘riqlidir. Shu va boshqa sabablarga ko‘ra men iste'foga chiqmoqdaman va bu haqidagi tegishli maktubni Boliviya parlamentiga jo‘natmoqdaman», deb aytgan Morales matbuot anjumanda.
Morales mamlakatda yuz berayotgan tartibsizliklar tezda to‘xtashiga umid bildirgan. U, shuningdek, mamlakatda zo‘ravonlik avj olmasligi tufayli iste'foga chiqqanini ma'lum qilgan.
U yuzaga kelgan vaziyatni davlat to‘ntaruvi deb atagan.
«Aka-uka, opa-singillar. Shuni aytmoqchimanki, bizning kurash to‘xtamaydi, biz tenglik va tinchlik uchun kurashni davom ettiramiz. Hozir prezident sifatidagi vazifam vaziyatni tinchlantirish yo‘lini topishdan iborat», deb qo‘shimcha qilgan u.
Morales, shuningdek, mamlakatni tark etmasligini aytgan. «Men Boliviyani tark etmayman. Mening qochishim uchun asos yo‘q», deya ta'kidlab o‘tgan Morales.
Ommaviy namoyishlar 20 oktabr kuni o‘tkazilgan saylovlar natijalari norozilik uyg‘otishi ortidan boshlangandi.
Saylovda Morales 41,7 foiz ovoz olgan, uning asosiy raqibi, sobiq prezident Karlos Mesa esa 36,51 foiz ovoz olgandi.
Morales birinchi turda g‘alaba qozongani va to‘rtinchi muddatga prezident bo‘lishga haqli ekanini ta'kidlagandi.
Bu 2016 yilgi referendum natijalariga ham zid bo‘lib, o‘shanda xalq uning to‘rtinchi marta prezidentlikka saylanishiga qarshilik bildirgandi.
Yakshanba kuni xalqaro kuzatuvchilar prezidentlik saylovida qoidabuzarliklar bo‘lganini ma'lum qildi. Amerika davlatlari tashkiloti vakillari soxta imzolar va natijalarning ommaviy manipulyatsiyasi holatlari aniqlanganini qayd etishgan.
Shundan so‘ng tog‘ sanoati vaziri va parlamentning quyi palatasi spikeri kabi nufuzli amaldorlar iste'foga chiqishdi, ular Moralesning asosiy ittifoqchilari sanalishardi, Bosh prokuratura esa respublika Oliy Saylov tribunali harakatlari yuzasidan tekshiruv boshlanishini ma'lum qildi.
Prezident saylovlar qayta o‘tkazilishini ma'lum qilib, saylov organi tarkibini almashtirdi, ammo namoyishchilar bunga rozi bo‘lishmadi, bir necha soat o‘tib, armiya va politsiya rahbarlari talabidan keyin prezident davlat telekanali orqali murojaat bilan chiqib, o‘z iste'fosini e'lon qildi.
Morales mamlakatni 14 yildan oshiq vaqt davomida boshqardi, u respublika tarixidani hindulardan chiqqan ilk prezident bo‘lgandi.
Kuba Moralesni qo‘llab-quvvatlab, uning ketishini davlat to‘ntaruvi deb atagan. Meksika hukumati ham Moralesga Boliviya poytaxti La-Pasdagi elchixonasida boshpana berishga tayyorligini ma'lum qilgan.
Boliviya konstitutsiyasiga ko‘ra, prezident o‘z lavozimidan ketgach uning majburiyatlari dastlab vitse-prezidentga, so‘ngra senat spikeriga, undan keyin deputatlar palatasi spikeriga o‘tadi. Biroq ularning barchasi mamlakatni boshqarishdan bosh tortishgan.
Boliviya senatining ikkinchi vitse-spikeri, muxolifat vakili Janin Anes oliy hokimiyat mamlakat rahbariyati iste'fosidan keyin unga o‘tishini e'lon qilgan.
Pagina 7 nashrining yozishicha, Moralesning samolyoti Argentina bo‘ylab parvoz rejasini so‘ragan. Ta'kidlanishicha, Moralesning ukasi El-Alto aeroportidan uchib ketgan.
