Vazirlar Mahkamasi Oltinsoy tumani bo‘yicha qaror qabul qiladi

Surxondaryo viloyatining Oltinsoy tumanini kompleks ijtimoiy-iqtisodiy rivojlantirish rejalashtirilyapti.

Vazirlar Mahkamasining “2020- 2022 yillarda Surxondaryo viloyatining Oltinsoy tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi qarori loyihasi e'lon qilindi.

Hujjatga ko‘ra, Surxondaryo viloyati hokimligi, O‘zbekiston Respublikasi Iqtisodiyot va sanoat vazirligi, Investitsiyalar va tashqi savdo vazirligi, Moliya vazirligi hamda boshqa manfaatdor vazirliklar, xo‘jalik boshqaruvi organlari va tijorat banklari tomonidan ishlab chiqilgan 2019-2022 yillarda Surxondaryo viloyatining Oltinsoy tumanini kompleks ijtimoiy-iqtisodiy rivojlantirish chora-tadbirlari dasturi ma'qullanadi.

Quyidagilar Dasturni amalga oshirishning asosiy ustuvor yo‘nalishlari etib belgilanadi:

tumanni ijtimoiy-iqtisodiy jihatdan yanada rivojlantirish, aholining, xususan xotin-qizlar, yoshlar va kam ta'minlangan fuqarolarning bandligini ta'minlash orqali ularning daromadlarini va turmush darajasini oshirish;

tumanda meva va sabzavot ishlab chiqarish samaradorligini oshirish, samarasiz, eskirgan bog‘ va tokzorlarni yangilash, agroklasterlar tashkil etish orqali qishloq xo‘jaligi mahsulotlari eksportini oshirish;

yangi ishlab chiqarish quvvatlarini yaratish, mavjud ishlab chiqarish quvvatlarini modernizatsiya qilish orqali sanoat mahsulotlari ishlab chiqarish hajmlarini ko‘paytirish;

aholini tadbirkorlikka keng jalb qilish va oilaviy tadbirkorlikni yanada rivojlantirish uchun qulay shart-sharoitlar yaratish;

muhandislik-kommunikatsiya va ijtimoiy infratuzilmani rivojlantirish, shu jumladan, ichki yo‘llarni va ijtimoiy soha obektlarini rekonstruksiya qilish va qayta ta'mirlash, aholining toza ichimlik suvi, tabiiy gaz, elektr energiyasi bilan ta'minlanganlik darajasini oshirish;

sug‘oriladigan yerlarning meliorativ holatini yaxshilash, qishloq xo‘jaligi mahsulotlari yetishtirishni ko‘paytirish va ularni qayta ishlash darajasini oshirish ishlarini jadal rivojlantirish;

tumanning me'moriy qiyofasini tubdan o‘zgartirish hamda obodonlashtirish ishlarini jadallashtirish.

Suv xo‘jaligi vazirligi, Moliya vazirligi, Surxondaryo viloyati hokimligi Oltinsoy tumanining Xidirsho va Obshir mahalla fuqarolar yig‘ini markaziga “Xazirbog‘” kanalidan 250-300 l/sek suv chiqarish uchun 2020 yil 1-choragida suv chiqarish nasos stansiyasi qurilishini davlat dasturiga kiritish choralarini ko‘radi.

O‘zbekiston Respublikasi Markaziy banki bog‘dorchilik va uzumchilik fermer xo‘jaliklari hamda kichik biznes sub'yektlariga qulay bank xizmatlari ko‘rsatishga sharoit yaratish maqsadida tumanda DATB Asaka banki, TIF Milliy banki va ATB Mikrokredit bank filiallarini tashkil etadi.

“Davergeodezkadastr” qo‘mitasi:

Dasturiga kiritilgan loyihalarga istisno tariqasida to‘g‘ridan-to‘g‘ri (auksionsiz) yer maydoni ajratishga ruxsat beradi;

tuman markazi bosh rejasida ko‘p qavatli uy joylar, sanoat zonasi, savdo va maishiy xizmat ko‘rsatish nuqtalari qurilishi uchun mo‘ljallangan qishloq xo‘jaligi xaritasidagi 331-konturdagi 2,9 gektar, 336 konturdagi 3,9 gektar, 331-konturdagi 2,9 gektar, 336-konturdagi 3,9 gektar, 345-konturdagi 3,5 gektar, 475-konturdagi 3,6 gektar hamda 262 konturdagi 3,0 gektar jami 16,9 gektar yer maydonini qishloq xo‘jaligi yer fondi balansidan chiqaradi.

Avtomobil yo‘llari qo‘mitasi tuman markazidan o‘tuvchi va asosiy yo‘l hisoblanadigan Mustaqillik ko‘chasini 4,2 km qismini umumfoydalanuvdagi avtomobil yo‘llari turkumiga kiritadi.

Suv xo‘jaligi vazirligi “Hazarbog‘-Oqqapchig‘ay” kanalining “Islom taraqqiyot banki” mablag‘lari hisobidan rekonstruksiya qilinayotganligini inobatga olib, kanalning tuman markazidan o‘tadigan qismidagi mavjud ko‘priklarni zamonaviy loyihalar asosida rekonstruksiya qilishni hamda respublika Kasaba uyushmalari Federatsiyasi tomonidan 5 qavatli 150 o‘rinli zamonaviy sanatoriy qurilayotganligi sababli aholi va transport vositalarini o‘tib qaytishi hamda infratuzilmani yaxshilash maqsadida “Hazarbog‘-Oqqapchig‘ay kanallari tizimini qayta ishlash” loyihasiga ko‘prik qurilishini qo‘shimcha ravishda kiritadi.