Maxsus unvonga ega soliqchilarning bepul maxsus formali kiyim-bosh bilan ta'minlanishi bekor qilinadi

Davlat soliq xizmati organlarida maxsus unvon berilgan shaxslarning belgilangan normalar bo‘yicha bepul maxsus formali kiyim-bosh bilan ta'minlanishi bekor qilinadi. Bu haqdagi tegishli qonun loyihasi muhokama uchun joylashtirildi.

Hujjat loyihasiga ko‘ra, O‘zbekiston Respublikasining 1997 yil 29 avgustda qabul qilingan “Davlat soliq xizmati to‘g‘risida”gi Qonuni 15-moddasining ikkinchi qismi chiqarib tashlanadi.

15-moddada davlat soliq xizmati organlari mansabdor shaxslarining moddiy va ijtimoiy ta'minoti belgilab qo‘yilgan.

Moddaning birinchi qismiga ko‘ra, davlat soliq xizmati organlari mansabdor shaxslarining ish haqi - mansab maoshi, maxsus unvon, ko‘p yil xizmat qilganligi uchun to‘lanadigan ustama haqlar hamda O‘zbekiston Respublikasi Vazirlar Mahkamasi belgilaydigan tartibda to‘lanadigan boshqa qo‘shimcha haqlardan iborat bo‘ladi.

Ikkinchi qismda esa maxsus unvon berilgan shaxslar belgilangan normalar bo‘yicha bepul maxsus formali kiyim-bosh bilan ta'minlanishi aytiladi. Qonun loyihasi bilan ushbu qism olib tashlanishi mo‘ljallanmoqda.

Shuningdek, 15-moddaning uchinchi qismiga ko‘ra, davlat soliq xizmati organlarida maxsus fond tashkil etilishi mumkin, uni hosil qilish tartibi qonun hujjatlarida belgilab qo‘yiladi.