«O‘zbekiston prezidentining Moskvaga tashrifi rejada yo‘q edi» - Putinning matbuot kotibi tashrif qoldirilgani haqida

Rossiya prezidenti matbuot kotibi Dmitriy Peskov jurnalistlarning O‘zbekiston prezidenti Shavkat Mirziyoyevning 5 fevral kuni Moskvaga tashrifi nega qoldirilgani to‘g‘risidagi savolga javob qaytardi.

«5 fevral kuniga bunday tashrif rejalashtirilmagandi. Uning tashrifi bo‘yicha hech qanday reja yo‘q edi, shu tufayli tashrif qoldirilgani to‘g‘risidagi gapga o‘rin yo‘q. Bu to‘g‘ri ma'lumot emas», deya Peskovning so‘zlarini keltirmoqda RIA Novosti.

Bundan avvalroq «Kompaniya» jurnali Rossiya Federatsiyasi Tashqi ishlar vazirligidagi manbasiga asoslanib O‘zbekiston prezidenti Shavkat Mirziyoyevning 5 fevral kuni Moskvaga amalga oshirilishi kerak bo‘lgan tashrifi bekor qilingani to‘g‘risida xabar tarqatgandi.

Eslatib o‘tamiz, o‘tgan yilning oktyabrida O‘zbekiston Senati raisi o‘rinbosari Sodiq Safoyev Shavkat Mirziyoyevning O‘zbekiston prezidenti sifatida Rossiyaga ikkinchi tashrifi 2020 yilning fevralida amalga oshirilishi haqida ma'lum qilgandi. Keyinroq, o‘tgan yilning dekabri oxirida O‘zbekiston Tashqi ishlar vaziri o‘rinbosari Ilhom Ne'matov ikki tomon O‘zbekiston prezidentining Moskvaga tashrifi 2020 yilning 5 fevralida bo‘lishiga tayyorlanayotgani haqida xabar qildi.

Rossiya Tashqi ishlar vazirligining You Tube portalidagi kanalida joylashtirilgan videoda esa 2020 yilning yanvarida Rossiya Tashqi ishlar vaziri Sergey Lavrovning Toshkentga tashrifi vaqtida (15-16 yanvar) O‘zbekiston prezidenti Shavkat Mirziyoyev rossiyalik vazirga Moskvaga tashrifi fevraldan iyulga ko‘chirilgani to‘g‘risida aytganini ko‘rish mumkin. Prezident «Yaxshilab tayyorgarlik ko‘rish kerakligi, kun tartibi mukammal bo‘lishi» maqsadida shunday qarorga kelingani haqida gapirgan.

24 yanvarda esa O‘zbekiston tashqi ishlar vaziri Abdulaziz Komilov Rossiya tashqi ishlar vaziri Sergey Lavrov bilan telefon orqali suhbatlashib, Shavkat Mirziyoyevning Rossiyaga tashrifiga tayyorgarlik masalalarini muhokama qilgandi.