Erdo‘g‘an muxolif partiya deputatini sudga berib 165 ming dollar tovon puli talab qilmoqda

Turkiya prezidenti Rajab Toyyib Erdo‘g‘an muxolif Respublika xalq partiyasi deputati  Engin O‘zko‘chdan 1 mln turk lirasi (165 ming dollar) miqdorida tovon puli talab qilib uni sudga berdi. Bu haqda Turkiya prezidentining advokati o‘z Twitter akkauntida yozdi.

Da'vo arizasida yozilishicha, deputatning so‘zlari prezidentning sha'niga putur yetkazadi va "butkul yolg‘on" hisoblanadi. 

"O‘rtacha aqlga ega inson ham bu ayblovlar asossiz va adolatsiz ekanligini tushuna oladi", - deyiladi da'vo arizasida.

4 mart kuni O‘zko‘ch Turkiya parlamentida Erdo‘g‘anni Suriyadagi siyosati uchun tanqid qilgan. Shundan keyin ikki partiya deputatlari o‘rtasida o‘zaro mushtlashuv boshlanib ketgan.

Voqea O‘zko‘ch Erdo‘g‘anning Respublika xalq partiyasi yetakchisi Kamol Qilichdoro‘g‘luga qo‘yayotgan ayblovlariga javob berayotganida yuz bergan. Turkiya prezidenti Qilichdoro‘g‘luni Idlibdagi vaziyat keskinlashgani ortida Suriya prezidenti Bashar Asad bilan muzokaralarni boshlash taklifi uchun “sotqin” deb atagan. O‘zko‘ch o‘z navbatida Erdo‘g‘anni halok bo‘lgan turk harbiylari haqida gapirganda “kalla” (turkchada o‘lik odamning qo‘pol atalishi) so‘zini qo‘llaganlikda hamda sotqinlikda ayblagan.  

Anqara bosh prokuraturasi “prezidentni haqoratlagani” uchun O‘zko‘chga nisbatan ish ochgan.