Bozorlar va gazetalar. O‘zbekistonda mingdan ortiq korxonalarning davlat ulushi to‘liq sotiladi

Hozirgi vaqtga kelib davlat ulushidagi korxonalar soni 2965tani tashkil etayogan bo‘lsa, shulardan 58 foizi DUK, 33 foizi MChJ hamda 9 foizi AKga tegishlidir.

Unga ko‘ra, davlat ulushi to‘liq sotiladigan davlat ishtirokidagi korxonalarga quyidagilar kirishi ma'lum qilindi: Neft va gaz sohasida 69ta, energetikada 25ta, kimyo sanoatida 8ta, bank va moliya tashkilotlarida 4ta, yog‘-moy tashkilotlarida 16ta, alkogol mahsulotlari ishlab chiqaruvchi tashkilotlarda 11ta, loyihalash institutlarida 23ta, gazeta va jurnallarda 94ta, bozorlar va komplekslarda 509ta hamda boshqa 336ta qo‘shimcha korxonalar.

Shu bilan birga, ushbu qarorda ko‘pgina kompaniyalarning isloh qilinishi ham nazarda tutilgan. Jumladan, «O‘zbektelekom», «O‘zbekiston temir yo‘llari», «O‘zmaxsusmontajqurilish», «O‘zdonmahsulot», «O‘zbekoziqovqatxolding», «O‘zavtosanoat», «O‘zagrosanoatxolding», «O‘zagrokimyohimoya», «Toshshahartransxizmat», «O‘zpaxtasanoat», «O‘zagroservis», «O‘zkimyosanoat» kabi kompaniyalar ham mavjud. Ushbu kompaniyalarda ko‘pgina islohotlarning amalga oshirilishi belgilab qo‘yildi.

Loyihalarning hayotga tatbiq etilishi natijasida davlat ishtirokidagi korxonalarni 81 foizga kamaytirish, davlat unitar korxonalarini 96 foizga qisqartirish, 20ta jamiyatlarda IPO o‘tkazish, kuzatuv kengashi mustaqil a'zolari sonini 20 foizgacha ko‘paytirish kutilmoqda.

«Uzbekistan Airways», «O‘zbekneftgaz», «O‘ztransgaz», «NTKMK», «OTMK», «O‘zmetkombinat», «O‘zbektelekom», «Toshkent RFB» boshqa jami 554ta korxona davlat ixtiyorida saqlab qolinsa, ularning 44tasi qisman sotuvga qo‘yiladi.

Qaror bozorlar tizimiga ham ta'sir etmasdan qolmadi. Shu sababli «Farhod dehqon bozori», «Askiya dehqon bozori», «Mirobod dehqon bozori», «Chorsu buyum savdo kompleksi», «Yunusobod dehqon bozori», «O‘rikzor», «Chilonzor» va «Bekto‘pi savdo kompleks»lari va boshqa bozorlar shular jumlasidandir.

Shu bilan birga, «Ma'rifat» gazetasi tahririyati davlat unitar korxonasi (DUK), «Sharq» AJ, «Huquq va burch» ijtimoiy jurnali DUK, «O‘zbekiston nashriyot matbaa uyi» DUK, «G‘ofur G‘ulom» nomidagi nashriyot matbaa uyi DUK, «O‘qituvchi ilmiy-metodik nashriyot markazi» DUK, shuningdek, «UZDIGITAL TV» MChJ ham davlat ulushidan xususiy sektorga sotilishi belgilab qo‘yildi.

Bundan avvalroq ham prezident qarori loyihasi asosida O‘zbekistonda 1115ta davlat ulushlari xususiy sektorga sotilishi haqida xabar berilgan edi.