Qashqadaryo viloyat hokimiga yangi o‘rinbosar tayinlandi

Qashqadaryo viloyati hokimiga yoshlar masalalari bo‘yicha yangi o‘rinbosar tayinlandi, shuningdek, viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimi nomlanishi o‘zgardi.

Foto: Qashqadaryo viloyati hokimligi axborot xizmati

Rustam Doniyorovich Yo‘ldoshev — viloyat hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari lavozimiga tayinlangan. U bu lavozimda avvalroq hokim o‘rinbosari - mahalla va oilani qo‘llab-quvvatlash boshqarmasi boshlig‘i lavozimiga o‘tkazilgan Dolli Allayev o‘rnida ish boshlaydi.

Rustam Yo‘ldoshev bunga qadar O‘zbekiston Respublikasi Vazirlar Mahkamasi huzuridagi ta'lim sifatini nazorat qilish davlat inspeksiyasining Samarqand viloyati bo‘limi boshlig‘i sifatida faoliyat yuritib kelayotgandi.

Qashqadaryo viloyat hokimligi matbuot xizmati xabariga ko‘ra, viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimi mukammallashtirildi.

Xabar qilinishicha, viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimi joriy etilgan. Ushbu lavozimga amalda faoliyat yuritib kelgan O‘tkir Umirovich Bo‘tayev tayinlangan.

Shuningdek, viloyat kasbiy ta'limni rivojlantirish va muvofiqlashtirish hududiy boshqarmasining o‘quv metodik ta'minot bo‘limi bosh mutaxassisi sifatida ishlab kelgan Oybek O‘ktam o‘g‘li Jo‘raqulov — viloyat hokimligi rahbar kotibi lavozimiga tayinlangan.

#Qashqadaryo viloyati