Qashqadaryo yil oxirigacha kambagʻallik va ishsizlikdan xoli hududga aylantiriladi
|12:262 0297 min
Qashqadaryoda 2026-yil oxirigacha kambagʻallik va ishsizlikni tugatish uchun aniq hisob-kitoblar bor, dedi Shavkat Mirziyoyev. Yigʻilishda “Sultonteks” klasteri rahbari Nurbek Ergashev va limonchilik maktabini yaratgan Abdumannop Xudoyberdievga davlat mukofotlari berildi. “Mutolaa” loyihasi bosh muharriri Javlon Jovliev va “Yosh kitobxon oila” tanlovining ikki gʻolibiga Toshkentdan yangi xonadonlar sovgʻa qilindi.
Foto: Prezident matbuot xizmatiFoto: Prezident matbuot xizmati
Prezident Shavkat Mirziyoyev Qashqadaryoga tashrifida viloyatni ijtimoiy-iqtisodiy rivojlantirish boʻyicha yigʻilish oʻtkazmoqda.
Davlat rahbari yigʻilish ishtirokchilarini Oʻzbek tili bayrami bilan tabriklab,Qashqadaryo farzandi, Oʻzbekiston Qahramoni va davlat madhiyamiz muallifi Abdulla Oripovni yodga oldi.
Bir necha yil avval eng murakkab vaziyatdagi hududlardan biri boʻlgan Qashqadaryoni yil yakuniga qadar kambagʻallik va ishsizlikdan xoli hududga aylantirish maqsad qilingan. Shavkat Mirziyoyev bu natijaga erishish uchun aniq hisob-kitoblar mavjudligini qayd etdi.
“Kecha viloyatning shahar va tumanlarida, mahallalarida boʻlgan oʻzgarishlarni koʻrib, tadbirkor, investor, yoshlarning koʻzlaridagi shijoatni koʻrib, juda katta kuch oldim”,– dedi prezident.
Davlat rahbari “Sultonteks” klasteri rahbari Nurbek Ergashevning energiya va suvni tejaydigan zamonaviy korxonasi faoliyati bilan tanishganini aytdi. Tadbirkorning 2028-yilgacha yana 30 ming kishini ish bilan taʼminlash, ayniqsa, ayollar uchun koʻproq imkoniyat yaratish rejalari qoʻllab-quvvatlandi.
Shavkat Mirziyoyev Nurbek Ergashevga “Oʻzbekistonda xizmat koʻrsatgan tadbirkor” faxriy unvonini berish toʻgʻrisidagi farmonga imzo qoʻyganini bildirdi.
Qamashi tumanidagi Chim mahallasida sulolaviy limonchilik maktabini yaratib, aholi daromadini oshirishga hissa qoʻshayotgan Abdumannop Xudoyberdievga ham “Oʻzbekistonda xizmat koʻrsatgan qishloq xoʻjaligi xodimi” unvoni beriladi.
Qashqadaryoda maʼrifatni targʻib etayotgan “Mutolaa” loyihasining bosh muharriri Javlon Jovlievning mehnati ham eʼtirof etildi. Unga, shuningdek, “Yosh kitobxon oila” respublika tanlovi gʻoliblari Baxtishod Rashidov va
Mavzuga oid
Eʼzoza Xushvaqtovaga
Toshkent shahridan ikki xonali yangi xonadonlar sovgʻa qilinishi aytildi.
Davlat rahbari mazkur mukofotlarni shu yerning oʻzida topshirishni taklif etdi.
Iqtisodiy oʻsish
Qashqadaryoda yilning toʻqqiz oyida sanoat 8,4 foiz, xizmatlar 16,6 foiz, qishloq xoʻjaligi 4,9 foizga oʻsdi. Shu bilan birga, prezident hozirgi natijalar bilan viloyatning mavjud salohiyati oʻrtasida hali katta farqborligini koʻrsatib oʻtdi.
Aholi jon boshiga sanoat mahsulotlari boʻyicha viloyat respublikada yettinchi, xizmatlar boʻyichatoʻqqizinchi, qishloq xoʻjaligi va qurilish hajmi boʻyicha oʻn birinchi oʻrinda. Shavkat Mirziyoyev tuman hokimlari va banklar“bilimga – ragʻbat, mehnatga – imkoniyat, tashabbusga – madad” beradigan muhit yaratsa, Qashqadaryo bir-ikki yilda eng ilgʻor hududlar qatoriga chiqishi mumkinligini taʼkidladi.
Sanoat
Sanoatda yangi bosqichga oʻtish uchun viloyatda yetarli resurs bor. Gaz, elektr va yer osti boyliklarini daromadli ish oʻrinlari hamda yuqori qoʻshilgan qiymatga aylantirish vazifasi qoʻyildi.
GTL zavodida qiymati 300 million dollar boʻlgan uchta yirik loyiha tayyor. Zavoddan olinadigan 430 ming tonna nafta asosida yangi polimerlar va neft-kimyomahsulotlari ishlab chiqarish boʻyicha 1,5 milliard dollarlik loyihani amalga oshirish mumkin.
Dehqonobod kaliy zavodi quvvatini 365 ming tonnadan 600 ming tonnaga yetkazish imkoniyati, kichik tonnajli kimyo yoʻnalishida esa 830 million dollarlik 30 dan ortiq loyihaviy taklif bor.
Viloyatga tayinlangan loyiha menejeri va boshqa masʼullarga 20 milliard dollarlik loyihalar va 50 ming ish oʻrniniqamrab oladigan uchyillik dasturtayyorlash topshirildi.
Qashqadaryo sanoatida yirik korxonalar atrofida kooperatsiya zanjirlarinishakllantirishga alohida eʼtibor qaratiladi. Yil yakunigachaGʻuzor, Shoʻrtan, Muborak, Dehqonobod va Nishonda oltita sanoat klasteri tashkil etish, Shoʻrtan, Muborak, Yakkabogʻ va Kosonda “Qashqadaryo” erkin iqtisodiy zonasi filiallarini ochish vazifasi qoʻyildi. Infratuzilma uchun dastlab 250 milliard soʻm yoʻnaltiriladi.
Shuningdek, Xitoyning FM World korxonasida yigʻilayotgan zamonaviy traktor va qishloq xoʻjaligi texnikalarini mahalliylashtirish, mazkur korxonada agrodronlar ishlab chiqarish loyihalarini boshlash belgilandi.
Energetika
Prezident oʻtgan hafta energetika sohasidagi yirik investorlarning tashabbuslarini birma-bir eshitganini qayd etdi. Masdarkompaniyasikelasi yilQashqadaryoda 300 megavattli quyosh elektr stansiyasiva 75 megavattli energiya saqlash quvvatiniishga tushiradi. Ushbu loyiha qiymati 250 million dollar.
Qarshi tumanida xitoylik hamkor ishtirokida chiqindidan elektr energiyasi olish boʻyicha 45 megavattli loyiha yakunlanmoqda. Elektr tarmoqlarini mustahkamlash uchun Nishon va Koʻkdalada ikkita yirik podstansiya qurilishiga 70 million dollar jalb qilinadi. Ularni kelasi yil ishga tushirish vazifasi qoʻyildi.
Tolimarjon – Soʻgʻdiyona yoʻnalishidagi 245 kilometr yangi elektr tarmogʻiga 150 million dollar ajratilgan. Mutasaddilarga ushbu loyihani kelasi yil yakunlash topshirildi.
Qishloq xoʻjaligi
Qashqadaryo qishloq xoʻjaligining oʻzida qoʻshimcha 200 ming kishini daromadli qilish imkoniyati bor. Shu maqsadda Jahon banki bilan Misr tajribasi asosida sakkizta tumandagi 100 ming gektar yaylovga dronlar yordamida qurgʻoqchilik va shoʻrga chidamli chorva ozuqasi ekish boshlanadi.
Bu ishlar Nishon, Gʻuzor, Muborak, Koʻkdala, Koson, Mirishkor, Qamashi va Dehqonobodda olib boriladi. Mazkur tumanlarda 10 ming boshdan yirik va 50 ming boshdan mayda shoxli chorva komplekslarini tashkil etish vazifasi qoʻyildi. Import qilingan chorvani aholiga sotishda qoʻshilgan qiymat soligʻining nol stavkasi qoʻllanadi.
Gʻuzor tumanida 10 ming gektar yer foydalanishga kiritiladi. Yerning yarmida paxta, qolgan qismida ozuqa ekinlari yetishtiriladi. Yerlar dehqonlarga berilib, klaster tizimi yoʻlga qoʻyiladi.
Yerlarni xoʻjalik aylanmasiga kiritish uchun bir haftada imtiyozlar paketini ishlab chiqish topshirildi.
Kosmik maʼlumotlar asosida Qashqadaryoda foydalanishga kiritish mumkin boʻlgan yana 30 ming gektar yer aniqlandi. Uning eng katta qismi Muborak, Koson va Koʻkdalaga toʻgʻri keladi. Nishon, Qamashi, Qarshi, Mirishkor, Gʻuzor, Yakkabogʻ, Kitob, Chiroqchi va Shahrisabzda ham qoʻshimcha maydonlar oʻzlashtiriladi. Bu ishga Misrdan oʻn nafar doimiy maslahatchi jalb etiladi.
Prezidentimiz Qashqadaryoda ekin maydonlariga suv yetkazish murakkab va qimmatga tushayotganiga eʼtibor qaratdi.
Kelasi yil 265 kilometr kanal betonlashtiriladi, 20 ta nasos yangilanadi. Bu ishlarga 550 milliard soʻm ajratiladi. 2027-yilda fermerlar bilan birga 75 ming gektarda suv tejovchi texnologiyalar joriy etiladi.
Bu yil Koson, Nishon, Qamashi va Mirishkorda sigʻimi 50 ming kub metrdan boʻlgan toʻrtta kichik suv hovuzi qurildi. Mazkur tajriba kengaytirilib, 1-iyungacha Koson, Nishon, Mirishkor, Qamashi va Yakkabogʻning har birida yana ikkitadan shunday hovuz barpo qilinadi.
