Toshkent viloyatida quvvati 240 MVt bo‘lgan IES quriladi

Prezidentning “Toshkent viloyatida quvvati 240 MVt bo‘lgan issiqlik elektr stansiyasi qurilishini tashkil etish chora-tadbirlari to‘g‘risida”gi qarori loyihasi muhokama uchun joylashtirildi.

Qayd etilishicha, O‘zbekiston Respublikasi Hukumati nomidan O‘zbekiston Respublikasi Investitsiyalar va tashqi savdo vazirligi, “AKSA ENERJI ÜRETIM A.Ş.” (Turkiya Respublikasi) kompaniyasi va “AKSA ENERJI ÜRETIM A.Ş.” (Turkiya Respublikasi) kompaniyasi tomonidan O‘zbekiston Respublikasida qarorda belgilangan elektr stansiyani qurish loyihasini amalga oshirish uchun tashkil etilgan korxonasi o‘rtasida “Toshkent viloyatida quvvati 240 MVt bo‘lgan kombinatsiyalangan siklli elektr stansiyasini qurish” investitsiya loyihasini to‘g‘ridan-to‘g‘ri xorijiy investitsiyalar hisobiga amalga oshirish bo‘yicha Investitsiya kelishuvi imzolangan;

“O‘zbekiston milliy elektr tarmoqlari” AJ va Loyiha kompaniyasi o‘rtasida 25 yil muddatga elektr energiyasini sotib olish shartnomasi tuzilgan.

O‘zbekiston Respublikasi Hukumati nomidan O‘zbekiston Respublikasi Investitsiyalar va tashqi savdo vazirligi hamda “AKSA ENERJI ÜRETIM A.Ş.” o‘rtasida imzolangan Investitsiya kelishuvi tasdiqlanadi.

“O‘zbekiston milliy elektr tarmoqlari” AJga Elektr energiyasini sotib olish shartnomasi doirasida quyidagilarga ruxsat beriladi:

ishlab chiqariladigan elektr energiyasini olti oy ichida sotib olinishini qoplash uchun majburiyatlar bajarilishini ta'minoti sifatida O‘zbekiston Respublikasining yuqori darajadagi reytingi bo‘lgan tijorat bankining tiklanadigan, qaytarib berilmaydigan va sharsiz uzoq muddatli xorijiy valutada bank kafolati Loyiha kompaniyasi foydasiga ochishga;

investitsiya loyihasi ehtiyoji uchun tabiiy gaz va texnik suv yetkazib beruvchi sifatida ishtirok etishiga;

Loyiha kompaniyasiga texnik suv va tabiiy gazni yetkazib berish bo‘yicha O‘zbekiston Respublikasi Suv xo‘jaligi vazirligi va “O‘ztransgaz” AJ bilan uzoq muddatli shartnomani imzolashga;

jalb qilinadigan chet el investitsiyalari bo‘yicha O‘zbekiston Respublikasi hududida realizatsiya qilinadigan tovarlar (ishlar, xizmatlar) narxlarini chet el valutasiga istisno tariqasida bog‘lagan holda belgilashga.

O‘zbekiston Respublikasi Suv xo‘jaligi vazirligi va “O‘ztransgaz” AJ “O‘zbekiston milliy elektr tarmoqlari” AJ bilan Elektr energiyasini sotib olish shartnomasida ko‘zda tutilgan hajmlarga va parametrlarga muvofiq Loyiha kompaniyasiga tabiiy gaz va texnik suv yetkazib berish to‘g‘risida shartnomalarning imzolanishini ta'minlaydi.

Bunda, O‘zbekiston Respublikasi Suv xo‘jaligi vazirligi va “O‘ztransgaz” AJning aybi bilan tabiiy gaz va texnik suv yetkazib berilmasligi natijasida “O‘zbekiston milliy elektr tarmoqlari” AJ tomonidan Loyiha kompaniyasiga yetkazilgan zararlar, shu jumladan barcha turdagi jarima va yo‘qotilgan foyda summalarini to‘lab berish majburiyati yuzasidan agarda shartnomada boshqa shartlar ko‘rsatilmagan bo‘lsa, tabiiy gaz va texnik suv yetkazib beruvchilar “O‘zbekiston milliy elektr tarmoqlari” AJ oldida amaldagi qonun hujjatlariga muvofiq regress tartibida javobgar bo‘lishi belgilab qo‘yiladi.

O‘zbekiston Respublikasi Markaziy bankiga respublikada yuqori darajadagi reytingga ega tijorat banklari tomonidan “O‘zbekiston milliy elektr tarmoqlari” AJ uchun imtiyozli shartlarda tiklanadigan, qaytarib bo‘lmaydigan va sharsiz bank kafolati berilishini ta'minlash tavsiya etiladi.

Toshkent viloyati hokimligi, O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda Loyiha kompaniyasiga Elektr energiyasini sotib olish shartnomasida ko‘rsatilgan shartlarda yerni ijaraga berish bo‘yicha shartnoma imzolagan holda investitsiya loyihasini amalga oshirish muddatiga teng davrga foydalanish uchun yer uchastkasi ajratilishini ta'minlaydi.

Investitsiya loyihasini amalga oshirish doirasida, Loyiha kompaniyasiga:

imzolangan Investitsiya kelishuvi va Elektr energiyasini sotib olish shartnomasi bo‘yicha huquq va majburiyatlar beriladi;

O‘zbekiston Respublikasi hududidan tashqarida bank hisob-raqamlarini ochib, investitsiya loyihasini amalga oshirish uchun respublikada ochilgan bank hisob-raqamlaridan xorijda ochilgan bank hisob-raqamlariga pul mablag‘larini o‘tkazishga;

xorijiy pudratchilar, yetkazib beruvchilar yoki xorijiy kreditorlarga to‘lovlarni O‘zbekiston Respublikasi tashqarisida bunday to‘lovlarni O‘zbekiston Respublikasi bank hisobvaraqlari orqali o‘tkazmasdan to‘g‘ridan-to‘g‘ri amalga oshirishga ruxsat beriladi.

O‘zbekiston Respublikasi Investitsiyalar va tashqi savdo vazirligi, “O‘zbekiston milliy elektr tarmoqlari” AJ va Toshkent viloyati hokimligiga investitsiya loyihasini amalga oshirish doirasida Loyiha kompaniyasi tomonidan Investitsiya shartnomasi bo‘yicha majburiyatlar bajarilmagan taqdirda, Loyiha kompaniyasi va kreditorlar o‘rtasida Loyiha kompaniyasining huquq va majburiyatlarini kreditorlarga berishni nazarda tutadigan tegishli bitimlar tuzish huquqi beriladi.