AQSh prezidenti Donald Tramp Shimoliy Koreya yetakchisi Kim Chen Inning sog‘lig‘i yomonlashgani haqidagi ma'lumotlarga munosabat bildirib, ular hech kim tomondan tasdiqlanmaganini aytdi.
“Men unga sog‘liq tilayman, chunki agar u yangiliklarda aytilayotgandek holatda bo‘lsa, bu juda jiddiydir”, deb aytgan Tramp Oq uydagi brifingda.
“Hech kim buni tasdiqlamadi. CNN’ning xabarlariga uncha ham ishonmayman”, deb qo‘shimcha qilgan AQSh prezidenti.
Tramp bu vaziyatda Kim Chen In bilan bog‘lanib ko‘rishga harakat qilishini aytgan.
“Kim Chen In bilan yaxshi munosabatdaman. Bu butun mamlakatga foydalidir. Men u bilan barchasi yaxshi bo‘lishini istayman”, deb ta'kidlab o‘tgan Oq uy rahbari.
Tramp jurnalistlarning Shimoliy Koreyada hokimiyat topshirilishi mumkinligi haqidagi savollariga javob berishdan qochgan. “Undan bu haqda so‘ramoqchimasman”, deb javob qilgan Tramp.
Avvalroq CNN telekompaniyasi AQSh ma'muriyatidagi manbaga tayanib, AQSh Kim Chen In sog‘lig‘i yomonlashgani haqidagi razvedka ma'lumotlarini o‘rganayotganini ma'lum qilgan. Biroq nashr bu ma'lumotning hech qanday tasdig‘ini keltirmagan.
O‘z navbatida, Janubiy Koreya rasmiylari Kim Chen In betobligi haqida ma'lumotlarga ega emasliklarini ma'lum qilishgan. Shuningdek, Xitoy tashqi ishlar vazirligida ham CNN’ning manbasiga shubha bildirilgan.
