Jahon iqtisodiyoti koronavirus sababli 2020 yilda 8,5 trln dollar yo‘qotadi - BMT

Bu haqda BMTning iqtisodiy va ijtimoiy masalalar bo‘yicha departamenti tayyorlagan “Jahon iqtisodiy holati va istiqbollari” ma'ruzasiga tayanib ENCA telekompaniyasi xabar berdi.

“Bunday o‘lchamdagi yo‘qotishlar jahon yalpi ichki mahsulotining avvalgi 4 yilgi o‘sishini yo‘qqa chiqaradi”, deyilgan hujjatda. Sanoati rivojlangan davlatlar YaIM pasayishi 2020 yilda ko‘proqni - 5 foizgachani tashkil qiladi, rivojlanayotgan davlatlar umumiy YaIM esa 0,7 foizga qisqaradi.    

Koronavirus pandemiyasi sababli cheklovlar ostiga jahon iqtisodiyotining 90 foizi tushgan. Bu esa ishlab chiqarish zanjirlari ishidagi uzilishlar, iste'mol talabining pasayishi, ishsizlik darajasi oshishiga olib keldi.

BMT mutaxassislari hisob-kitobiga ko‘ra, pandemiya ommaviy qashshoqlashuvga olib keladi, bunda 34,3 mln kishi nochorlikka uchraydi. Bu sondan 56 foizi Afrikaga to‘g‘ri keladi.  

“Ko‘plab davlatlar hukumatlari hozirda qabul qilayotgan rag‘batlantiruvchi choralar ijobiy omil hisoblanadi. Bu choralar jahon YaIMning 10 foizigacha yetmoqda. Pandemiyadan keyin jahon iqtisodiyoti tiklanishi sur'atlari davlatlarning iqtisodiyotda ish o‘rinlarini saqlab qolishi va aholining eng ko‘p jabrlangan guruhlarini daromad bilan ta'minlay olishiga bog‘liq bo‘ladi”, deb aytgan BMTning bosh iqtisodchisi va bosh kotibning iqtisodiy rivojlanish bo‘yicha yordamchisi Elliot Xarris.