Yuqori Chirchiqda qurib qolgan ko‘l bo‘yida dam olish zonasi barpo etiladi

Toshkent viloyatining Yuqori Chirchiq tumanidagi eski qurib qolgan ko‘l bo‘yida dam olish zonasi barpo etiladi. Bu yerda restoran, akvapark, kottejlar qurilishi, daryo bo‘yida esa baliqchilik hududi tashkil etilishi ko‘zda tutilgan

Loyihaning umumiy qiymati 40 million AQSh dollari iborat bo‘lib, mingga yaqin ish o‘rinlari yaratiladi.

“Tadbirkor Gulinur Abdullayevaning biznes rejasiga ko‘ra, ko‘lga yangidan suv olib kelinadi. Shuningdek, bu yerdagi oshxonalarda dunyodagi turli xil davlatlarning taomlarini tayyorlash ham yo‘lga qo‘yiladi. Maqsad oromgohga turistlarni jalb qilib, yangi ish o‘rinlari yaratish.

Buning uchun yetarli miqdorda elektr energiyasi va kanalizatsiya masalasida mahalliy hokimlikning yordami kerak bo‘ladi. Toshkent viloyati hokimi Rustam Xolmatov sayyor qabulda mazkur loyiha yaqindan tanishib, ijobiy hal etish yuzasidan mutasaddilarga tegishli ko‘rsatmalar berdi”, deydi viloyat hokimligi axborot xizmati rahbari Behzod Qobulov.

Bo‘stonliq tumanidagi “Xumson bulog‘i” oromgohida tashkil qilingan sayyor qabulda viloyat hokimi tomonidan 300 nafarga yaqin tadbirkorning muammosi tinglandi. Murojaatlarining aksariyati turli xil turistik obe'ktlar qurish uchun yer maydoni ajratilishi so‘rashgan. Ishchi guruh tomonidan eng sara loyihalar tanlab olingan.

Xususan, tadbirkor Abror Adhamov taqdim etgan loyihaga ko‘ra, Bo‘stonliq tumanida bir gektar maydonda ko‘p tarmoqli reabilitatsiya markazi barpo etiladi. Loyiha muvofiq 7-8 mln AQSh dollari midorida investitsiya kiritilib, zamonaviy shifo maskani quriladi.

Tadbirkor “Chorvoq” erkin turistik zonasi direksiyasidan joy so‘ragan, barcha zarur hujjatlarni ham topshirgan. Reabilitatsiya markazi ishga tushsa, 100 kishi yotib davolanish imkoniyatiga ham ega bo‘ladi, 150-200 kishi ish bilan ta'minlanadi. Sayyor qabulda tadbirkorning loyihasi ijobiy baho oldi.

“Biz bundan uch  yil muqaddam Nanay qishlog‘ida sobiq poliklinikaning ikkita binosini sotib oldik. Qariyb 5 milliard so‘mga yaqin investitsiya kiritib, dam oluvchilar uchun uch qavatli mehmon uyi barpo etdik. Lekin binoda qishloq vrachlik punkti ham joylashganligi bois, faoliyatimizga xalaqit bermoqda.  Shu bois, yangi qishloq vrachlik punkti binosi qurish uchun uchun yer ajratilsa,  biz uni bunyod etish niyatimiz bor. Ushbu taklif bilan hokim qabuliga kelgandik, muammomiz ijobiy hal etilib, tegishli tashkilotlarga topshiriq berildi”, – deydi tadbirkor Ahmadjon Umarov.