Yoqilg‘i-energetika resurslaridan samarali va oqilona foydalanish rag‘batlantiriladi - Prezident qarori

O‘zbekiston prezidentining «Iqtisodiyotning energiya samaradorligini oshirish va mavjud resurslarni jalb etish orqali iqtisodiyot tarmoqlarining yoqilg‘i-energetika mahsulotlariga qaramligini kamaytirishga doir qo‘shimcha chora-tadbirlar to‘g‘risidagi» PQ–4779-sonli qarori qabul qilindi.

Qarorga ko‘ra, 2020 yil 1 avgustdan hududiy elektr tarmoqlari korxonalari tomonidan elektr energiyasini yangi ishga tushiriladigan quyosh, shamol, biogaz elektr stansiyalari, quvvati 1 MVtgacha bo‘lgan mikro va kichik GESlardan, shu jumladan o‘z ehtiyojlari uchun ishlab chiqarilgan ortiqcha elektr energiyasini kafolatlangan sotib olish bo‘yicha tarif sotish, tarqatish va yetkazib berish xarajatlari chegirib tashlangan holda II tarif guruhi iste'molchilari darajasida belgilanadi.

Sanoat ko‘lamidagi (1 MVt va undan ortiq) qayta tiklanuvchi energiya manbalari (GESlardan tashqari) sohasidagi loyihalarni amalga oshirish uchun potensial investorlarni aniqlash shaffof auksion (tanlov) savdolari orqali amalga oshiriladi.

2020 yil 15 iyuldan 31 dekabrgacha:

750 kVAgacha bo‘lgan quvvatda ulangan hamda qo‘shimcha uchinchi smenani tashkil etgan mahsulot ishlab chiqaruvchi va xizmat ko‘rsatuvchi iste'molchilar (DSQ tomonidan tasdiqlangan ro‘yxat bo‘yicha) uchun tungi davr — sutkaning qorong‘i davrida (yagona elektr energetika tizimining soat 22:00 dan 24:00 gacha va soat 00:00 dan 06:00 gacha bo‘lgan minimal yuklamalar soatida) foydalanilgan elektr energiyasi bo‘yicha hisob-kitoblarda belgilangan tarifga nisbatan 1,5 barobar miqdorda kamaytirish koeffitsiyenti qo‘llaniladi.

Yuridik shaxslar tomonidan tabiiy gaz va elektr energiyasi uchun oldindan to‘lov kiritish to‘g‘risidagi majburiy talabni 30 foizgacha kamaytirish imkoniyati davlat korxonalari va ustav kapitalida davlat ulushi 50 foiz va undan ortiq bo‘lgan yuridik shaxslarga tatbiq etilmaydi.

Shuningdek, prezident qarori bilan 3,3 mlrd kVt*soat elektr energiyasi, 2,6 mlrd kub metr tabiiy gaz va 16,5 ming tonna neft mahsulotlarini tejashni nazarda tutuvchi, 2020–2022 yillarda iqtisodiyot tarmoqlarida yoqilg‘i energetika resurslarini tejashning maqsadli parametrlari, Iqtisodiyot tarmoqlarining yirik energiya sarflovchi korxonalarida energiya samaradorligini oshirish va yoqilg‘i-energetika resurslarini tejash bo‘yicha «yo‘l xaritasi», Yoqilg‘i-energetika resurslari jami yillik iste'moli ikki ming tonnadan ortiq yoqilg‘i yoki ming tonnadan ortiq motor yoqilg‘isi bo‘lgan korxonalarni majburiy energetik tekshiruvi (energiya auditi) dan o‘tkazishning 2021–2022 yillarga mo‘ljallangan jadvali tasdiqlangan.

Budjetdan tashqari Tarmoqlararo energiyani tejash tashkil etilishi mo‘ljallanmoqda. Jamg‘arma tuzilmasi va kuzatuv kengashining tarkibi tasdiqlangan.