Sahih manbalarda ko‘prik qurish, yo‘llarni ta'mirlash “sadaqai joriya”, ya'ni vafotdan keyin ham insonlarga doimiy manfaat yetkazib turuvchi amallar qatorida e'tirof etilgan.
Poytaxtning Mirzo Ulug‘bek tumanidagi “Oqqo‘rg‘on” mahallasi bo‘ylab o‘tgan yo‘llar 20 yildirki ta'mirtalab. Asfalt yo‘llardagi nosozliklar avtomashinalar harakati, maktabga borishda yo‘lni kesib o‘tadigan o‘quvchilar qatnovi uchun noqulayliklar va xavf tug‘dirardi.
Milliy tiklanish demokratik partiyasi Xalq deputatlari Mirzo Ulug‘bek tumani Darxon okrugi deputati Muborak Yusupova mahalla ahlining bu mashaqqatini yengil qilish uchun bosh bo‘ldi. Deputatning tashabbusi va mahallaning bir necha tadbirkorlari saxovati bilan ularning shaxsiy mablag‘lari asosida yo‘llar ta'mirlandi. Maktab binosi, stadion va mahalla ichidan o‘tgan yo‘llarning nosoz qismlari yangidan asfaltlandi.
Mahalla ahli yo‘llarning obod bo‘lganidan xursand.
“Yillar davomida mahalla ichidagi yo‘llarning nosozligi aholini xunob qilar, bolalar maktabga qatnash uchun qiynalardi. Muborak Damirovna va bir qator tadbirkorlarimizning saxovati bilan yo‘llarning obod qilingani mahallaning ko‘rkiga ko‘rk qo‘shish bilan birga, aholi qulayligi, mashinalar qatnovidagi xavfsizlik uchun ham zamin bo‘ldi”, - deydi “Oqqo‘rg‘on” mahalla fuqarolar yig‘ini raisi Mahmud Abdullayev.
