«Oʻzbekiston temiryoʻllari» AJ maʼlumotiga koʻra, yangi yoʻl oʻtkazgich mavjud temiryoʻl kesishmasi oʻrnida barpo etilgan.
Ochilish marosimida Toshkent viloyati hokimi Z. Mirzayev, «Oʻzbekiston temiryoʻllari» AJ boshqaruvi raisi Z. Narzullayev, transport prokurori I. Narimov, mahalliy aholi va ommaviy axborot vositalari vakillari ishtirok etgan.
Loyiha doirasida uzunligi 23,6 metr boʻlgan ikki yoʻlli temiryoʻl koʻprigi qurilgan. Qurilish ishlaridan soʻng temiryoʻl izlari oʻz joyiga qaytarilgan.
Shuningdek, 1 200 metrlik aylanma temiryoʻl hamda avtomobil yoʻli barpo etilgan, 800 metr kontakt tarmogʻi koʻchirib oʻtkazilgan.
Qurilish davomida toʻsiq devor poydevori uchun 237 ta qoziq boʻyicha burgʻilash ishlari bajarilgan. Jami 60 ming kub metr tuproq ishlari amalga oshirilgan.
Hududda avtomobil va piyodalar yoʻlaklari ham qurib bitkazilgan. Yomgʻir va qor suvlarini xavfsiz oqizib yuborish uchun tegishli qurilmalar oʻrnatilgan.
Kompaniyaning bildirishicha, yoʻl oʻtkazgich Zangiota tumani aholisi va hudud orqali tranzit harakatlanuvchilar uchun qulaylik yaratadi. U avtomobil yoʻllaridagi kundalik yuklamani kamaytirish, yoʻldagi vaqtni tejash va harakat xavfsizligini oshirishga xizmat qilishi kutilmoqda.
