Pulini ololmay qolgan tibbiyot xodimlariga to‘lovlar to‘lab beriladi - Behzod Musayev

Bosh vazirning ijtimoiy masalalar bo‘yicha o‘rinbosari Behzod Musayev koronavirusga qarshi kurashayotgan tibbiyot xodimlari qo‘shimcha to‘lovlarni olmayotgani bilan bog‘liq holatlar bo‘yicha izoh berdi. Uning ma'lum qilishicha, shifokorlarning muammolarini eshitish uchun alohida ishonch telefoni liniyasi faoliyati yo‘lga qo‘yiladi.

«Koronavirusga qarshi kurashayotgan tibbiyot xodimlari har bir davolash davri (14 kun) uchun qo‘shimcha to‘lov hamshiralar 5 mln, kichik vrach 15 mln, vrachlar 25 mln so‘m olishi belgilangan edi. Ammo ular qo‘shimcha to‘lovni o‘z vaqtida olmayotgani bo‘yicha qator e'tirozlar bo‘ldi.

Biz bu holatlarning tagiga yetdik – ayrim texnik ishlar bor ekan. Koronavirusga qarshi kurashda ishtirok etgan hech bir tibbiyot xodimi to‘lovsiz qolmaydi. Tibbiyot xodimi istasa ishni boshlashdan avval to‘lovning 40 foizini oladigan, ishini tugatgandan keyin mehnat haqini to‘liq qo‘liga olishini ta'minlaydigan tizim yaratiladi.

Shuningdek, xodim pulni plastik kartadan olishida muammolar bo‘lmasligi uchun to‘lovni naqd pul ko‘rinishida berish masalasi ko‘rilmoqda. Kassir, hisobchi ishga chiqa olmay qolishi, karantin tufayli banklar bilan bog‘lana olmaslik holatlari bo‘lmasligi ta'minlanadi. Buni o‘zim nazoratga olaman.

Avvalambor hozirgacha ishlagan, lekin to‘lovini ololmagan tibbiyot xodimlariga berilmay qolgan to‘lovlar amalga oshiriladi. Bu bo‘yicha 71ta holat aniqlangan», dedi Behzod Musayev Xalqaro press-klubning koronavirus bilan bog‘liq vaziyat tahliliga bag‘ishlangan sessiyasida.

Shuningdek, shifokorlarning muammolarini qabul qilish uchun alohida ishonch telefoni tashkil qilinishini aytib o‘tildi.

«Tibbiyot xodimlarining to‘lovlarni o‘z vaqtida ololmasligi bilan bog‘liq muammolarini qabul qilish va hal qilish tizimini tashkil qilish uchun ishonch telefoni tashkil etiladi», deya uning so‘zlarini keltirmoqda Kun.uz muxbiri.