Farg‘ona viloyatida suvdan samarali foydalanish darajasini oshirish jamg‘armasi tashkil etiladi

Prezidentning “Farg‘ona viloyatida suvdan foydalanish samaradorligini oshirish yuzasidan qo‘shimcha chora-tadbirlar to‘g‘risida”gi qarori loyihasi muhokama uchun joylashtirildi.

O‘zbekiston Respublikasi Suv xo‘jaligi vazirligi, O‘zbekiston Respublikasi Qishloq xo‘jaligi vazirligi va Farg‘ona viloyati hokimligining O‘zbekiston Respublikasi Suv xo‘jaligi vazirligi huzuridagi yuridik shaxs maqomiga ega bo‘lmagan “Farg‘ona viloyatida suvdan samarali foydalanish darajasini oshirish jamg‘armasi”ni tashkil etish to‘g‘risidagi taklifi ma'qullanadi.

Belgilab qo‘yilishicha:

Jamg‘arma mablag‘lari Farg‘ona viloyatida irrigatsiya tizimlaridagi yo‘qotishlarni kamaytirish, suv xo‘jaligi irrigatsiya obektlarini qurish va rekonstruksiya qilish, ularni ta'mirlash-tiklash, suvni tejaydigan zamonaviy texnologiyalarni keng joriy qilish, suv xo‘jaligi obektlarida boshqaruv tizimlarini avtomatlashtirish tadbirlariga yo‘naltiriladi;

O‘zbekiston Respublikasi Suv xo‘jaligi vazirligi O‘zbekiston Respublikasi Qishloq xo‘jaligi vazirligi, Farg‘ona viloyati hokimligi bilan birgalikda belgilangan tadbirlar bo‘yicha bajarilishi lozim bo‘lgan ishlarni aniqlaydi va manzilli dasturlarni ishlab chiqadi. Mazkur manzilli dasturlar O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari tomonidan tasdiqlanadi.

O‘zbekiston Respublikasi Suv xo‘jaligi vazirligi, O‘zbekiston Respublikasi Qishloq xo‘jaligi vazirligi, O‘zbekiston Respublikasi Iqtisodiy taraqqiyot va kambag‘allikni qisqartirish vazirligi, O‘zbekiston Respublikasi Tiklanish va taraqqiyot jamg‘armasi hamda Farg‘ona viloyati hokimligining Jamg‘armaga O‘zbekiston Respublikasi Tiklanish va taraqqiyot jamg‘armasidan 25 million AQSh dollari ekvivalentida so‘mda kredit ajratish to‘g‘risidagi taklifiga rozilik beriladi.

Mazkur kredit O‘zbekiston Respublikasi Suv xo‘jaligi vazirligiga 3 yil muddatga, shu jumladan, 1 yil imtiyozli davrni hisobga olgan holda yillik foiz stavkasi 6 oylik LIBOR + 3 foizda O‘zbekiston Respublikasi Vazirlar Mahkamasi tomonidan tasdiqlanadigan loyihalarning manzilli ro‘yxatlariga muvofiq bosqichma-bosqich ajratiladi.

O‘zbekiston Respublikasi Suv xo‘jaligi vazirligi qarz oluvchi hamda O‘zbekiston Respublikasi Tiklanish va taraqqiyot jamg‘armasi tomonidan ajratiladigan kreditdan maqsadli va samarali foydalanish uchun mas'ul bo‘lgan ijro etuvchi organ hisoblanadi.

Kreditning asosiy qarz qismi va foiz to‘lovlari O‘zbekiston Respublikasi Suv xo‘jaligi vazirligining Farg‘ona viloyatida joylashgan tizim tashkilotlarini saqlash uchun har yili viloyat mahalliy budjetidan ajratiladigan mablag‘larni maqbullashtirish hisobiga iqtisod qilingan mablag‘ hisobidan qoplanadi.