Olimlar hanuz koronavirusning kelib chiqishi manbasini aniqlay olishmadi

Olimlar hanuzgacha koronavirusning kelib chiqishiga sabab bo‘lgan manbani aniqlay olishmadi. Das Erste nashri koronavirus Xitoyning Uhan shahrida 2019 yil dekabr oxirida ilk bor qayd qilingandan bir necha oy oldin paydo bo‘lganidan darak beruvchi bir qator tadqiqotlarni keltirib o‘tgan.

Xususan, fransiyalik shifokor Mixel Shmitt koronavirus alomatlarini o‘z bemorlarida 2019 yil noyabrida aniqlagan. Uning ta'kidlashicha, bemorlar o‘pkasining rentgen yordamida olingan suratlari ular o‘pkasining aynan shu virusdan zararlanganidan darak beradi. Bundan tashqari, ushbu bemorlarda keyinroq koronavirusga antitanalar aniqlangan.  

Shuningdek, koronavirus izlari Italiya va Braziliyada 2019 yil noyabr va dekabrda olingan suv namunalarida ham aniqlangan.  

Kembrij universiteti genetigi Peter Forster virus tarqalishini tahlil qilib, u 2019 yil sentyabridan dekabrigacha oraliqda paydo bo‘lgani haqidagi xulosaga kelgan.

Koronavirusning paydo bo‘lishi taxminiy joyi sifatida Xitoy va unga qo‘shni Osiyo davlatlari aytilmoqda. Biroq olimlar “nolinchi bemor” qayerda va qachon virusga chalinganini hanuzgacha aniqlay olishmadi.

Das Erst’ning yozishicha, Jahon sog‘liqni saqlash tashkiloti ham infeksiyaning manbasi borasida bir to‘xtamga ega emas. Avgust boshida JSST rahbari Tedros Gebreyyesus bu masalani o‘rganish bo‘yicha katta tadqiqot boshlanishini e'lon qilgan.