Germaniya hukumati: Navalniy «Novichok»ka o‘xshash moddadan zaharlangan

Bundesverning maxsus laboratoriyasida o‘tkazilgan test natijalari Navalniyning organizmida zahar izlari borligini ko‘rsatgan.

«Aleksey Navalniy Rossiyada kimyoviy modda bilan hujum qurboni bo‘lgan», — deyiladi bayonotda.

Germaniya hukumati YeI va NATO bo‘yicha hamkorlarga, shuningdek Kimyoviy qurollarni taqiqlash bo‘yicha tashkilotga tekshiruvlar natijalari yuborilishini ma'lum qilgan.

RFning Germaniyadagi elchisi ham tahlil natijalaridan rasman ogohlantirilgan. «Biz Rossiya hukumatini ushbu hodisani izohlashga chaqiramiz», — deyiladi Germaniya hukumati bayonotida.

RF TIV TASS agentligiga ma'lum qilishicha, Navalniy zaharlangani munosabati bilan Rossiya Bosh prokuraturasi tomonidan bir necha kun oldin Germaniyaga jo‘natilgan so‘rovga javob kutmoqda. Rossiya prezidenti matbuot kotibi Dmitriy Peskovning ma'lum qilishicha, hozircha Kremlga Germaniya hukumatidan hech qanday ma'lumot kelib tushmagan.

• Aleksey Navalniy 20 avgust kuni Tomskdan Moskvaga uchayotgan samolyotda ahvoli yomonlashganidan buyon komada. Uning yaqinlari siyosatchi zaharlangan, deb taxmin qilishgandi.
• Navalniy qariyb ikki sutka davomida Omksdagi klinikada yotdi, shundan so‘ng u Berlinga olib ketildi. Omskdagi klinika shifokorlari ikki sutka davomida uni olib ketishga ruxsat berishdan bosh tortdi va buni bemorning ahvoli barqaror emasligi bilan tushuntirdi. Ular siyosatchining organizmida zahar izlari yo‘qligini aytishgandi.
• «Sharite» klinikasi shifokorlari Navalniy olib kelinganidan ikki kun o‘tib, u xolinesteraza ingibitorlari ta'sirida ekanini ma'lum qilgandi.
• Rossiya Bosh prokuraturasi tekshiruv o‘tkazib, hodisa munosabati bilan jinoiy ish ochishga asos mavjud emas deb topgan.