Xitoyda Rossiyadan keltirilgan dengiz mahsulotlari qadog‘ida koronavirus aniqlandi

Xitoyda Rossiyadan import qilingan muzlatilgan kalmar qadog‘ida koronavirus aniqlandi. Bu haqda «Sinxua» agentligi xabar berdi.

Xabarda aytilishicha, Chanchun shahrida koronavirusning nuklein kislotasiga o‘tkazilgan muntazam tekshiruv vaqtida natija musbat chiqqan.

Qadoqda virusning mavjudligi Chanchundagi kasalliklarni nazorat va profilaktika qilish markazida o‘tkazilgan tekshiruvda yana bir marta tasdiqlangan.

Agentlikning yozishicha, xuddi o‘sha dengiz mahsulotlarining 10 kilosi Fuyuy shahriga jo‘natilgan bo‘lgan. Ushbu kalmarlarni sotib olganlardan koronavirusga test topshirish so‘ralgan.

Avgust oyida Reuters agentligi Ekvadordan Xitoyning Anxoy provinsiyasiga keltirilgan krevetkalar qadog‘ida virus zarralari aniqlangani haqida xabar bergandi. Xuddi shunday holat Shandun provinsiyasida ham qayd etilgan.