Sug‘urta sohasida oliy ma'lumotli kadrlar tayyorlash tizimi takomillashtiriladi

"Sug‘urta sohasida oliy ma'lumotli kadrlar tayyorlash tizimini yanada takomillashtirish chora-tadbirlari to‘g‘risida"gi Vazirlar Mahkamasi qarori loyihasi e'lon qilindi.

Sug‘urta bozori professional ishtirokchilarining xodimlarini sohaga ixtisoslashgan oliy ta'lim muassasalarining “Sug‘urta ishi” ta'lim yo‘nalishiga qabul qilish tartibi to‘g‘risidagi nizom tasdiqlanadi.

O‘zbekiston Respublikasi Oliy va o‘rta maxsus ta'lim vazirligi Moliya vazirligi huzuridagi Sug‘urta bozorini rivojlantirish agentligi bilan kelishilgan holda:

2020/2021 o‘quv yili uchun sug‘urta bozorining professional ishtirokchilari xodimlarini “Sug‘urta ishi” ta'lim yo‘nalishi bo‘yicha sirtqi va kechki ta'lim shakliga test sinovlari o‘tkazilmasdan, belgilangan qabul kvotalaridan tashqari to‘lov-kontrakt asosida qabul qilish jarayonini koronavirus pandemiyasi tufayli 2020 yilning oktabr-noyabr oylarida sohaga ixtisoslashgan Toshkent moliya institutida o‘tkazilishini;

2021/2022 o‘quv yilidan boshlab esa qabul jarayonini soha bo‘yicha yuqori malakali professor-o‘qituvchilar bilan ta'minlangan boshqa oliy ta'lim muassasalarida ham tashkil etish bo‘yicha takliflarni O‘zbekiston Respublikasi oliy ta'lim muassasalariga o‘qishga qabul qilish bo‘yicha davlat komissiyasiga kiritilishini ta'minlaydi.

Sug‘urta bozori professional ishtirokchilarining xodimlarini sohaga ixtisoslashgan oliy ta'lim muassasalarining “Sug‘urta ishi” ta'lim yo‘nalishiga qabul qilish tartibi to‘g‘risidagi nizomga ko‘ra, kamida ikki yil amaliy ish stajiga hamda umumiy o‘rta yoki o‘rta maxsus, kasb-hunar ma'lumotiga ega bo‘lgan xodimlarga sirtqi va kechki ta'lim shakliga suhbat natijalariga ko‘ra to‘lov-kontrakt asosida o‘qishga qabul qilishi uchun O‘zbekiston Respublikasi Moliya vazirligi huzuridagi Sug‘urta bozorini rivojlantirish agentligi bilan kelishilgan holda ish beruvchi tomonidan tasdiqlangan tavsiyanoma beriladi. Tavsiyanoma berilgan o‘quv yili uchun amal qiladi.

Nizom Ish beruvchining shtatida faoliyat ko‘rsatayotgan oliy ma'lumotga ega bo‘lgan xodimlarga hamda xizmat ko‘rsatish xodimlari va sug‘urta agentlariga nisbatan tatbiq etilmaydi.

Oliy ta'lim muassasasida talabalarni o‘qitish mavjud sirtqi va kechki shakllarda amalga oshiriladi.

Ish beruvchilar har yili 20 iyunga qadar istiqbolli nomzodlar bo‘yicha takliflarini Agentlikka kelishish uchun taqdim etadi.

Nomzodlarning hujjatlari har yili 1 iyulga qadar nizomning 2-bandida qayd etilgan talablar asosida Agentlik tomonidan ko‘rib chiqiladi va kelishilgan ro‘yxat oliy ta'lim muassasasiga hamda ish beruvchilarga yuboriladi.

Agentlik tomonidan kelishilgan ro‘yxat asosida ish beruvchilar har yili 15 iyulga qadar har bir nomzod uchun ilovaga muvofiq tavsiyanoma (firma blankida) beradi.

Tavsiyanoma ish beruvchining birinchi rahbari tomonidan imzolanadi va tasdiqlanadi.