Bahrayn bosh vaziri vafot etdi. Uning o‘rnini valiahd shahzoda egalladi

Bahrayn bosh vaziri Xalifa bin Salmon Ol Xalifa 11 noyabr ertalab 84 yoshida vafot etdi. Uning o‘rniga Bahrayn valiahd shahzodasi Salmon bin Hamad bin Iso Ol Xalifa yangi bosh vazir etib tayinlandi. Bu haqidagi farmonni podshoh shayx Hamad bin Iso Ol Xalifa imzolagan.

Xalifa bin Salmon Ol Xalifa Bahrayn bosh vaziri lavozimini 1970 yil yanvardan to vafotigacha egallab kelgan. U dunyoda bosh vazir lavozimini eng uzoq vaqt egallagan davlat arbobi sifatida tarixga kirgan. Marhum shahzoda amaldagi podshohning amakisi bo‘lgan. 

Xalifa bin Salmon Ol Xalifa 85 yoshga to‘lishiga ikki hafta qolganda AQShda davolanayotgan shifoxonada hayotdan ko‘z yumdi. Marhum shahzoda Bahrayn podshohlik oilasining eng boy vakili va mamlakatdagi eng yirik tadbirkorlardan biri sanalgan.

Shahzoda vafoti munosabati bilan podshohlikda bir haftalik motam e'lon qilingan. 3 kun davomida barcha davlat idoralari yopiq qoladi.

Bosh vazir lavozimini egallagan shahzoda Salmon 1969 yilda tug‘ilgan. U Bahrayn podshohining birinchi rafiqasidan to‘ng‘ich o‘g‘li hisoblanadi. 51 yoshli shahzoda valiahd shahzoda maqomini 1999 yilda olgan. U 2013 yil martidan beri bosh vazirning birinchi o‘rinbosari lavozimida ishlab kelgan va oxirgi vaqt hukumatni deyarli o‘zi boshqargan.