Japarov Qirg‘iziston prezidenti vakolatlari parlament spikeriga o‘tishini aytdi

Qirg‘iziston prezidenti vazifasini bajaruvchi, bosh vazir Sadir Japarovning prezidentlik vakolatlari parlament spikeriga o‘tadi. Bu haqda Japarov Bishkekda o‘tkazilgan matbuot anjumanida ma'lum qildi.

"Prezident saylovida qatnashish uchun vakolatlarimni topshirishim kerak. Vakolatlar avtomatik ravishda parlament spikeri Talant Mamitovga o‘tadi", - dedi u.

 Eslatib o‘tamiz, Sooronbay Jeenbekov 15 oktabr kuni Qirg‘iziston prezidentligidan iste'foga chiqdi.

 Prezidentning iste'fosidan keyin, Konstitutsiyaga ko‘ra, davlat rahbarining barcha majburiyatlari parlament spikeri Kanat Isayevga o‘tishi kerak edi. U bu vakolatdan voz kechgach, prezidentlik vakolatlari Sadir Japarovga o‘tdi.

 Qirg‘izistonda prezident saylovi 2021 yil 10 yanvarda bo‘lib o‘tishi rejalashtirilgan.