OAV: Tramp Erondagi yadro obektlariga zarba bermoqchi bo‘ldi, uni bu niyatidan qaytarishdi

Jurnalistlar Jo Bayden Eron bilan yadroviy kelishuvni tiklashi qiyin bo‘lishi uchun AQShning amaldagi prezidenti Tehron bilan munosabatlarni haddan tashqari yomonlashtirishga uringan bo‘lishi mumkinligini taxmin qilishmoqda.

Foto: The New York Times

AQSh prezidenti 12 noyabr kuni maslahatchilari bilan Erondagi uranni boyitish zavodiga hujum qilish ehtimollarini muhokama qilishgan. Bu haqda The New York Times nashri sobiq va hozirgi amerikalik amaldorlar orasidagi manbalariga asoslangan holda xabar tarqatdi. Donald Tramp Xalqaro atom energiyasi agentligining (MAGATE) Erondagi boyitilgan uran hajmi yadroviy kelishuvga ko‘ra ruxsat etilgan miqdordan 12 baravar ko‘pligi haqida e'lon qilganidan keyin aviazarba yoki kiberhujum imkoniyatlariga qiziqish bildirgan.

Oq uydagi uchrashuvda vitse-prezident Maykl Pens, davlat kotibi Maykl Pompeo, Mudofaa vaziri - Pentagon rahbari vazifasini bajaruvchi Kristofer Miller va AQSh Qurolli kuchlari shtab boshliqlari qo‘mitasi raisi, general Mark Milli ishtirok etgan. Ular Trampni prezidentligining so‘nggi haftalarida yuzaga kelishi mumkin bo‘lgan oqibatlaridan ogohlantirib, Netenzdagi zavodga hujum qilish fikridan qaytarishgan.

Shu bilan birga, The New York Times nashrining qayd etishicha, Tramp Eronga zarba berish niyatini hamon e'tiboridan soqit qilmagan.

Gazeta ma'lumotiga ko‘ra, noyabrda Mudofaa vaziri Mark Esper va boshqa yuqori martabali harbiy amaldorlar iste'foga chiqarilgach, Tramp Eronga qarshi oshkora yoki maxfiy amaliyotlar boshlashi mumkinligi haqida xavotirlar yuzaga kelgan. NYT nashrining qayd etishicha, Tehron bilan ziddiyat yana keskinlashishi Jo Bayden saylovoldi kampaniyasida va'da qilgan yadroviy kelishuvni tiklash bo‘yicha muzokaralarni murakkablashtirishi mumkin. Bu kelishuv 2015 yilda Barak Obama tomonidan tuzilgan, ammo Tramp o‘z prezidentligi boshida kelishuvni bekor qilgandi. Bu kelishuv ushbu mamlakatda yadroviy sohadagi faollikni cheklash evaziga sanksiyalarni yechishni nazarda tutardi.

Axios nashri 9 noyabr kuni Tramp ma'muriyati 2021 yilning 20 yanvariga qadar Eronga qarshi sanksiyalar qo‘llamoqchi ekani haqida xabar tarqatgandi. 10 noyabr kuni sanksiyalar yana olti tashkilot va to‘rt nafar jismoniy shaxsni o‘z ichiga olgan holda kengaytirildi.