2020 yil 24 noyabr kunidan boshlab poytaxtda Toshkent shahar IIBB YHXB hamda Majburiy ijro byurosi Toshkent shahar boshqarmasi xodimlari hamkorligida reyd tadbirlari o‘tkazilmoqda.
IIBB xabariga ko‘ra, tadbirlar blokpost va barcha yo‘l-patrul xizmati maskanlarida hamda markaziy ko‘chalarda majburiy ijro yurituvidagi qarzdorlik ishi yuzasidan 60 kunlik muddatda jarimalarni o‘z vaqtida to‘lamagan transport vosita egalarini aniqlash, ulardan jarimalarni undirish yuzasidan amalga oshirilyapti.
Qayd etilishicha, tadbir davomida reyd guruhlari bank xodimlari bilan birga xizmat olib bormoqda, haydovchilar bank xodimiga sayyor kassa orqali to‘lovlarni amalga oshirmoqda. Tadbir boshidan shu kunga qadar davlat g‘aznasiga 4 007 101 180 so‘m undirildi.
Ma'lumot o‘rnida, haydovchilar yo‘l harakati qoidalarini buzganlik uchun jarima solish haqida qaror chiqarilgan kundan e'tiboran oltmish kun ichida jarima to‘lamagan taqdirda Ma'muriy javobgarlik to‘g‘risidagi kodeksning 291-moddasi tartibida transport vositalari jarima maydoniga qo‘yilib, jarima to‘langunga qadar ushlab turiladi.
