14:56 / 10.12.2020
2104
Ўзбекистон ва Қирғизистон қўшма корхоналар сонини оширишни режалаштирмоқда

Фарғонада Ўзбекистон ва Қирғизистон Республикаси чегараолди вилоятлари ҳокимлари, ваколатли вакиллари кенгашининг учинчи йиғилиши бўлиб ўтди.

Дастлаб Ўзбекистон Республикаси бош вазири ўринбосари - инвестициялар ва ташқи савдо вазири Сардор Умрзоқов ва Қирғизистон Республикаси бош вазирининг биринчи ўринбосари Артём Новиков ўртасида икки томонлама учрашув бўлиб ўтди.

Kun.uz мухбири хабар беришича, учрашувда кўп қиррали шериклик масалалари, шунингдек, савдо-иқтисодий ҳамкорликни мустаҳкамлаш, саноат кооперациясини ривожлантириш ҳамда транспорт-логистика, маданий-гуманитар соҳаларда ўзаро алоқаларни кенгайтириш бўйича истиқболли чоралар муҳокама қилинди.

Ўзбекистон чегараолди вилоятлари раҳбарлари ва Қирғизистон ҳукуматининг чегараолди вилоятларидаги ваколатли вакиллари кенгашининг 3-йиғилишида делегациялар раҳбарларидан ташқари, Ўзбекистоннинг Андижон, Наманган ва Фарғона вилоятлари ҳокимлари, Қирғизистоннинг Боткен, Жалолобод ва Ўш вилоятларидаги ҳукумат ваколатли вакиллари, шунингдек, икки давлат вазирликлари ва идоралари раҳбарлари иштирок этди.

Йиғилишда чегараолди ҳудудлар ўртасида барча соҳаларда ҳамкорликни йўлга қўйиш, савдо-иқтисодий, инвестициялар жалб этиш, қўшма корхоналар ташкил этиш каби муҳим масалалар муҳокама қилинди.

Маълум бўлишича, жорий йилда Фарғона вилояти ва қўшни Қирғизистон ўртасида 127 миллион АҚШ долларига тенг товар айланмасига эришилган. Бунда фарғоналиклар 100 миллион доллар ҳажмида маҳсулот экспорт қилган. Қирғизистондан вилоятга 27 миллион долларга тенг маҳсулот импорт қилинган. Мазкур кўрсаткичларни янада ошириш мақсадида 14та қўшма корхона сони келгуси йилда яна бештага ортиши режа қилинган.

Учрашув давомида савдо-сотиқни кенгайтириш, транспорт-логистика соҳасида ҳамкорликни ривожлантиришга алоҳида эътибор қаратилди. Қирғизистон томони кўмир, гўшт ва гўшт маҳсулотлари, қурилиш  хом ашёси таклифи билан чиққан бўлса, Ўзбекистондан қишлоқ ҳўжалиги маҳсулотлари, енгил саноат ва бошқа ўнлаб турдаги истеъмол товарлари импорти қирғизистонликлар учун муҳим эканлигини билдирди.

Шунингдек, мулоқотда маданий–гуманитар алоқаларни мустаҳкамлаш, зиёрат туризмини ривожлантириш, туристик маршрутларни шакллантириш  юзасидан ҳам фикр алмашилди.

Учрашув якунида икки томонлама ҳамкорликни кенгайтириш ва чуқурлаштириш учун «йўл харитаси»ни имзолаш тўғрисида келишувга эришилди.

Top