Tadbirkorlarni tekshirishda ularning faqatgina oxirgi uch yillik faoliyati o‘rganiladi 

Prezidentning “Tadbirkorlik sohasida davlat nazoratining sifati va ko‘lamini tubdan takomillashtirish chora-tadbirlari to‘g‘risida”gi farmoni loyihasi e'lon qilindi.

Belgilanishicha, 2021 yil 1 maydan boshlab tadbirkorlik sub'yektlarini tekshirishda ularning faqatgina oxirgi uch yillik davridagi faoliyati o‘rganiladi, jinoyat ishi doirasida o‘tkaziladigan tekshirishlar bundan mustasno.

Nazorat tadbirini amalga oshirishda nazorat qiluvchi organlar mansabdor shaxslarining noqonuniy qarorlari yoki boshqa harakatlari natijasida tadbirkorlik sub'yektiga yetkazilgan zararlar, shu jumladan boy berilgan foyda birinchi navbatda nazorat qiluvchi organning budjetdan tashqari mablag‘lari, bunday mablag‘lar yetarli bo‘lmaganda esa davlat budjeti hisobidan qoplanadi, keyinchalik aybdor shaxsdan regress tartibida undirib olinadi.

Nazorat qiluvchi organlar tadbirkorlik sub'yektlariga ularga nisbatan amalga oshirilishi rejalashtirilgan nazorat tadbiri to‘g‘risida xabarnomada taraflar huquq va majburiyatlari, korrupsiyaviy huquqbuzarliklar uchun taraflar javobgarligi, korrupsiya alomatlari vujudga kelganda xabar berish tartibi, mansabdor shaxslarning harakati ustidan shikoyat berish tartibi va manfaatlar to‘qnashuvi bilan bog‘liq masalalarni majburiy tartibda ko‘rsatadi.

Xabarnomada yuqoridagi holatlar nazarda tutilmagan taqdirda nazorat tadbirini amalga oshirishga hamda to‘plangan ma'lumotlar nazorat yakuni bo‘yicha qaror qabul qilishda foydalanishga yo‘l qo‘yilmaydi.