Taksi haydovchilari daromad solig‘idan ozod etilgan shaxslar qatoriga qo‘shiladimi?

Moliya vaziri o‘rinbosari Dilshod Sultonov yakka tartibda yo‘lovchi tashish bilan shug‘ullanuvchi haydovchilar ham  o‘zini o‘zi band qilgan shaxslar sifatida e'tirof etilishini ma'lum qildi. Bu haqda Kun.uz muxbiri xabar berdi.

«Masalaning yechimini o‘ylaganda, yo‘lovchilar xavfsizligini ta'minlash ustuvor masala bo‘lyapti. Haydovchining sog‘lig‘i va mashinaning texnik ko‘rigi mutasaddilar tomonidan nazorat qilinishi lozim. Transport vazirligining taklifi bilan, taksi agregat kompaniyalari (Yandeks, MyTaxi kabi ilovalar – tahr.) bilan yaqindan hamkorlik qilish haqida o‘ylanmoqda. Shunda, haydovchilar maxsus o‘rnatilgan moslamalar orqali sog‘lig‘ini avtomatik tekshiruvdan o‘tkazishi ham nazarda tutilgan», — deydi u.

Moliya vaziri o‘rinbosarining aytishicha, ko‘chalarda alkotester va ko‘z orqali inson sog‘lig‘ini aniqlaydigan maxsus moslamalar o‘rnatiladi va haydovchilar shunday nuqtalarga kelib, vaqti-vaqti bilan moslama bilan muloqotda bo‘ladi.

Dilshod Sultonov taksi haydovchilari ham  o‘zini o‘zi band qilgan shaxslar qatoriga qo‘shilib, 12 oy uchun bir marta 223 ming so‘m to‘lagan holda o‘z faoliyati bilan bemalol shug‘ullanishi mumkin ekanini aytdi.

«Ularning daromadlari soliqqa tortilmaydi. To‘lanadigan 223 ming so‘m esa pensiya va staj hisoblash uchun yo‘naltiriladi. Ya'ni, haydovchilarning kelgusida staji ham, pensiya ham bo‘ladi», — deydi u.

Axborot va ommaviy kommunikatsiyalar agentligida o‘tkazilgan matbuot anjumanida Davlat soliq qo‘mitasi raisi o‘rinbosari Fazliddin Umarov kirakashlik bilan shug‘ullanayotganlar nima uchun o‘zini o‘zi band qilgan fuqarolar ro‘yxatiga kiritilmagani haqidagi savolga javob qaytargandi.

Uning ta'kidlashicha, kirakash o‘zini o‘zi band qiluvchi sifatida ro‘yxatdan o‘tsa, aholining xavfsizligini ta'minlash bilan bog‘liq masala yuzaga keladi, ya'ni, aholi tashish bilan shug‘ullanuvchi korxonalarga qo‘yiladigan talablarni har bir o‘zini o‘zi band qilgan kirakash ham bajarishi kerak.

Avvalroq, keng jamoatchilik 2021 yil 1 yanvardan jismoniy shaxslarga o‘zini o‘zi band qilgan shaxslar sifatida 5 kishidan ko‘p bo‘lmagan o‘rindiqli (haydovchini hisobga olgan holda) yengil avtomobil transportida tashish faoliyatini amalga oshirishga ruxsat berilishini kutayotgandi. Ammo ushbu kutilma amalga oshmagan.

Sentyabr oyi boshida moliya vaziri o‘rinbosari Dilshod Sultonov taksichilarni ham o‘zini o‘zi band qilganlar ro‘yxatiga qo‘shish bo‘yicha ishlanayotgani va bu bo‘yicha 1-2 oyda Vazirlar Mahkamasiga taklif kiritilishini ma'lum qilgandi.

Eslatib o‘tamiz, shu yil 19 maydagi prezident selektorida taksichilar daromad solig‘ini to‘lashdan ozod etilishi ma'lum qilingan, ammo 9 iyunda e'lon qilingan tegishli qarorda taksichilar ko‘zda tutilmagandi.