Toshkentda taksichi uxlab qolgan yo‘lovchi nomiga 12 mln so‘m kredit oldi

Gumondorlar ushlanib, jabrlanuvchiga yetkazilgan moddiy zarar qoplab berilgan.

Foto: Videodan kadr

Toshkent shahrida taksi haydovchisi uxlab qolgan yo‘lovchining nomiga kredit olib, o‘z ehtiyojlari uchun sarflab yuborgani aniqlandi.

Toshkent shahri IIBB xabariga ko‘ra, taksiga chiqqan yo‘lovchi ayol mast holatda bo‘lgan. U telefonini haydovchiga manzil geolokatsiyasini ko‘rsatish uchun bergan va uxlab qolgan. Haydovchi va uning sherigi telefondagi ilova orqali mijoz nomiga 12 million so‘m miqdorida mikroqarz rasmiylashtirgan. Pulni o‘z kartasiga o‘tkazib, bankomatdan yechib olgan.

Toshkent shahri IIBB Axborot texnologiyalari sohasidagi jinoyatlarga qarshi kurashish boshqarmasi xodimlari tomonidan olib borilgan tezkor tadbirda ikkala shaxs ushlangan.

Holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilgan.

Ta’kidlanishicha, jabrlanuvchiga yetkazilgan moddiy zarar qoplab berilgan. Tergov harakatlari davom etmoqda.