Chust tumanidagi ikkita bog‘chadan 165 mln so‘mlik zarar davlat hisobiga undirildi

Maktabgacha ta'lim vazirligining Ichki audit, moliyaviy va huquqiy nazorat xizmati tomonidan Namangan viloyati Chust tumanidagi 11-son va 19-sonli davlat maktabgacha ta'lim tashkilotining moliya-xo‘jalik faoliyati yuzasidan o‘rganish o‘tkazildi.

Vazirlik axborot xizmati xabariga ko‘ra, o‘rganish davomida 11-son davlat maktabgacha ta'lim tashkilotida 2016-2020 yillarda 19 nafar xodim nomiga hisoblangan 98 mln so‘m naqd pul xodimlarga berilmagan, 14 nafar o‘z vazifalarini bajarmagan xodim nomiga 145,7 mln so‘m ish haqi noqonuniy hisobdan chiqarilgan.

19-son davlat maktabgacha ta'lim tashkilotida 2018-2020 yillarda 8 nafar xodim nomiga hisoblangan 67 mln so‘m naqd pul xodimlarga berilmagan, 10 nafar o‘z vazifalarini bajarmagan xodim nomiga 63,8 mln so‘m ish haqi noqonuniy hisobdan chiqarilgan.

Qayd etilishicha, ushbu maktabgacha ta'lim tashkilotlari direktorlari hozirgi kunda lavozimidan ozod etilgan. O‘rganish hujjatlari qonuniy qaror qabul qilish uchun Namangan viloyat prokuraturasiga topshirilgan.

11-sonli MTTdan 98 mln so‘m va 16-son MTTdan esa 67 mln so‘m, jami 165 mln so‘m miqdorida davlat budjetiga yetkazilgan zarar davlat hisobiga undirilgani aytiladi.