12:00 / 07.03.2021
5177
ОКМК ўтган икки ойда 142,7 млн долларлик экспортни амалга оширди
Фото: ОКМК

Олмалиқ кон-металлургия комбинати меҳнат жамоаси томонидан 2021 йилнинг январь-февраль ҳолати бўйича юқори ишлаб чиқариш кўрсаткичлари қайд этилиб, ишлаб чиқарилган маҳсулотлар экспорти борасида ҳам қувонарли натижаларга эришилди.

ОКМК Металлургия хом ашёси билан таъминлаш ва сотиш бошқармаси тақдим этган маълумотларга кўра,  ўтган икки ойда  142 млн 761 минг АҚШ доллари миқдорида маҳсулотлар экспорти амалга оширилган. Режавий вазифа эса 153,3 фоизга бажарилганини алоҳида таъкидлаш жоиз.

Жумладан, 2021 йил январь-февраль ҳолатига кўра, 12362 тонна мис катоди экспорт қилинган ҳолда режа 130,6 фоизга уддаланган. Шунингдек, 1622 тонна мис катанкаси хорижлик импортёрларга жўнатилиб, режа 649 фоизга бажарилган. 

Бундан ташқари, 722 тонна мис қувурларининг экспорти амалга оширилиб, вазифа 205,4 фоизга етказиб бажарилган.

Йилдан йилга дунё бозорида харидоргир бўлиб бораётган рух экспорти режаси 112,6фоизга бажарилган ҳолда, импортёрларга 8447 тонна ушбу металл юборилган.
Қурилишда энг зарур бўлган цемент экспортида 13566 тонналик натижа қайд этилган. 

Кимё саноатида муҳим аҳамият касб этувчи сульфат кислотаси экспорти режасининг бажарилиши бўйича 795,1фоизлик натижа қайд этилганини алоҳида таъкидлаш жоиз. Хорижлик харидорларга ушбу маҳсулотдан 13517тонна етказиб берилган. Шунингдек, 4069 тонна қўрғошин маҳсулотлари экспорт қилинган. 

Режавий вазифани юқори кўрсаткичларда ошиғи билан бажариш ҳолати молибден экспортида ҳам кузатилиб, 124 тонна ушбу металл харидорларга етказиб берилган ҳолда, режа 310 фоизга уддаланган.

Ўтган икки ой давомида 2336 тонна мис купороси импортёрларга жўнатилиб, режа 1168,1фоизга бажарилган.

Комбинат томонидан ишлаб чиқарилаётган маҳсулотлар асосан Туркия, Россия Федерацияси, Беларусь, Қозоғистон, Болгария, Озарбойжон, Қирғизистон, Украина, Польша, Тожикистон, Индонезия, Нидерландия, Хитой, Туркманистон, Афғонистон каби давлатларга экспорт қилинмоқда. 

ОКМК Ахборот хизмати

Top