O‘zbekiston Qirg‘izistonga 25 million dollarlik 120 ming tonna mineral o‘g‘it yetkazib beradi

O‘zbekiston Qirg‘izistonga 25 million dollarlik 120 ming tonna mineral o‘g‘it yetkazib berish bo‘yicha shartnoma imzoladi. Bu haqda “O‘zkimyosanoat” AJ matbuot xizmati xabar bermoqda.

Qayd etilishicha, Qirg‘iziston prezidentining davlat tashrifi doirasida “O‘zkimyosanoat”da “Qirg‘iziston o‘g‘it yetkazib beruvchilar assotsiatsiyasi” yuridik shaxslar uyushmasi vakillari bilan uchrashuv bo‘lib o‘tdi.

Uchrashuvda “O‘zkimyosanoat” vakillari “Qirg‘iziston o‘g‘it yetkazib beruvchilar assotsiatsiyasi” yuridik shaxslar uyushmasi raisi E.Akunbekov bilan muzokaralar olib bordi. Tadbir davomida Qirg‘izistonga mineral o‘g‘itlar va kimyoviy mahsulotlar yetkazib berish bo‘yicha ikki tomonlama hamkorlik masalalari muhokama qilindi.

Uchrashuv so‘ngida tomonlar “O‘zkimyosanoat” tomonidan 2021-2022 yillarda Qirg‘izistonga qiymati 25 mln dollarlik 120 ming tonna mineral o‘g‘it yetkazib berish bo‘yicha tijorat shartnomasi imzolandi.

Shuningdek, O‘zbekiston va Qirg‘izistonning mavjud mineral xomashyo resurslaridan foydalangan holda agromineral va bioorganik o‘g‘itlar ishlab chiqarishni tashkil etish bo‘yicha qiymati 1,5 mln dollarlik anglashuv memorandumi imzolandi.