Manba: Toshkent shahrida koronavirus aniqlanayotgan maktablar karantinga yopiladi

«Ertadan koronavirus aniqlangan va kasallik tarqalishi zanjiri yuz berayotgan maktablar karantinga yopiladi. O‘qish esa to‘liq onlayn olib boriladi. Shundan keyin 20 martdan bahorgi ta'til boshlanadi.

Bahorgi ta'tildan keyin nima bo‘lishi bo‘yicha esa vaziyatga qarab qaror qabul qilinadi. Bugun hokimiyatda o‘tgan yig‘ilishda shunday topshiriq berilgan», dedi shaxsi sir qolishi sharti bilan ma'lumot bergan manba.

Hozircha Toshkentdagi aynan qaysi maktablarda virus aniqlangani xabar qilinmagan.

Ma'lumot uchun, maktablarda bahorgi ta'til 20 martdan 28 martgacha davom etadi. 2021 yil 29 martdan o‘quv yilining 4-choragi boshlanadi.

O‘zbekistonda so‘nggi kunlarda koronavirus aniqlanishi bilan bog‘liq kunlik holatlar o‘smoqda. 14 mart kuni bemorlar soni 111 nafarga oshgan va shundan 93tasi Toshkent shahrida qayd etilgan. Sanitariya-epidemiologik osoyishtalik va jamoat salomatligi markazi Toshkent shahar boshqarmasi boshlig‘i Malika Qudratxo‘jayeva poytaxtda asosan maktablar o‘quvchilari, talabalar va tashkilotlar xodimlarida virus aniqlanayotganini ma'lum qilgan.

Bundan oldinroq Toshkent shahri Olmazor tumanidagi 117-sonli davlat maktabgacha ta'lim muassasasida tarbiyalanuvchilar va tarbiyachilarda koronavirus aniqlangani, natijada bog‘cha ish faoliyati vaqtincha to‘xtatilgani haqida xabar berilgandi.