Xitoy o‘lim jazolari soni bo‘yicha dunyoda birinchi o‘rinni egalladi - Amnesty International  

Xitoy 2020 yilda o‘lim jazolari soni bo‘yicha dunyoda birinchi o‘rinni egalladi, deb ma'lum qildi Amnesty International xalqaro nohukumat tashkiloti. 

"2020 yilda eng ko‘p qatl Xitoy, Eron, Misr va Saudiya Arabistonida amalga oshirildi", - deyiladi tashkilot hisobotida. 

Qayd etilishicha, Xitoydagi qatllarning asl miqyosini baholashning iloji yo‘q, chunki bu ma'lumotlar maxfiy.  

Tashkilotning ma'lumotiga ko‘ra, o‘tgan yili 18 mamlakatda kamida 483ta o‘lim jazosi ijro etilgan, 1477ta qatl hukmi chiqarilgan. 

O‘tgan yili dunyo bo‘yicha o‘limga hukm qilinganlar soni 28567 nafarni tashkil etgan. 

Xitoyni hisobga olmaganda, 2020 yilda qatllarning 88 foizi to‘rt mamlakat: Eron, Misr, Iroq va Saudiya Arabistoniga to‘g‘ri kelgan.  

Amnesty International tashkilotining ta'kidlashicha, o‘lim jazosi inson huquqlari, xususan, yashash huquqiga ziddir.  

Hozirda dunyoning 144 mamlakatida o‘lim jazosi taqiqlangan yoki qo‘llanmaydi.