Bayden prezidentligining ilk 100 kunida eng badavlat amerikaliklar yana 195 milliard dollarga boyishdi

Bloomberg axborot agentligi o‘tkazgan hisob-kitoblarga ko‘ra, 100 nafar eng badavlat amerikalikning umumiy boyligi 30 aprelda 2,9 trln dollarga yetdi. Bu ko‘rsatkich Bayden inauguratsiyasi o‘tgan 20 yanvardan beri 195 mlrd dollarga oshgan. Shu bilan birga AQShning eng kam daromadga ega 50 foiz aholisining umumiy boyligi ushbu ko‘rsatkichdan kamroqni - 2,5 trln dollarni tashkil qilmoqda.

AQShning asosiy birja indekslari fevral oyidan beri deyarli uzluksiz ravishda o‘sib bormoqda va rekord ko‘rsatkichlarni qayd qilmoqda. Jumladan, Dow Jones va S&P 500 indekslari bu vaqt ichida 10 foizdan ko‘proqqa o‘sgan.

Bayden tomonidan iqtisodiyotni jonlantirishga qaratilgan choralarning qabul qilinishi va katta ko‘lamli emlash iqtisodiyotning tez tiklanishiga va buning natijasida birjada narxlar oshishi hamda eng badavlat amerikaliklar boyligining ko‘payishiga olib keldi. Biroq ta'kidlash joiz, AQShda bunday ijobiy natijalar avvalgi prezident Donald Tramp prezidentlik muddatining oxirgi haftalarida ham kuzatilgan. 100 nafar eng badavlat amerikalikning boyligi AQSh prezidenti saylovlari o‘tgan 2020 yil 4 noyabrdan to Bayden inauguratsiyasigacha bo‘lgan vaqt ichida 267 mlrd dollarga ko‘paygan. 

AQSh iqtisodiyoti pandemiyadan keyin kutilgandan tezroq tiklanmoqda. Prognozlarga ko‘ra, AQSh yalpi ichki mahsuloti joriy yilda 6,4 foizga o‘sadi.