Xitoy janubidagi shahar koronavirus tarqalishi sababli to‘liq yopildi

Xitoyning Yunnan provinsiyasi ma'muriyati Myanma bilan chegaradosh Juyli shahrida koronavirus tarqalishi avj olgani sababli shaharga kirish-chiqish yo‘llarini yopdi.

Shahar meri Shan Labyan Juyliga barcha 8ta kirish-chiqish punkti yopilganini, uyda yakkalanish rejimi kiritilganini e'lon qilgan. Uning aytishicha, shaharda virusning mutatsiyaga uchragan turi jadal sur'atlar bilan tarqalmoqda.

Labyan butun mamlakat xavfsizligini ta'minlash uchun Juylida virusning oldini olish bo‘yicha qat'iy va ilmiy asoslangan dastur qabul qilinganini ta'kidlab o‘tgan.

Shaharda koronavirus tarqalishi sababli avvalroq qat'iy karantin cheklovlari qabul qilingan. Jumladan, 7 iyul soat 00:00dan shifoxona, dorixona va oziq-ovqat do‘konlaridan tashqari barcha korxona va tashkilotlar yopilgan.

Shahardan o‘ta zarur holatlarda chiqish uchun buning sababini asoslab berish va virusga manfiy test taqdim qilish lozim bo‘ladi.

Ta'kidlanishicha, shaharda virus tarqalishining yangi to‘lqinida kasallanganlarning aksariyatini myanmaliklar tashkil qilmoqda. Gap shundaki, Juylida ikki davlat o‘rtasida faol savdo-sotiq olib boriladi. Shu sababli hukumat chegaradagi nazoratni ham kuchaytirishga qaror qilgan. 

Ma'lumotlarga ko‘ra, shaharda 7 iyulda 15ta kasallanish holati qayd qilingan. Vaholanki, undan oldingi 2 kun kasallanish holatlari 6taginani tashkil etgan.