Almatida Qurbon hayiti tadbirlari onlayn shaklda o‘tkaziladi

Almati shahri bosh sanitar vrachi Jandarbek Bekshin shaharda Qurbon hayiti qanday tarzda nishonlanishi haqida ma'lumot berdi, deb yozadi Tengrinews.kz.

Bekshinning so‘zlariga ko‘ra, Qurbon hayiti bu yil ham o‘tgan yildagi kabi onlayn shaklda o‘tkaziladi.

«O‘tgan yili Qurbon hayitini ilk marta onlayn rejimda o‘tkazdik. O‘tgan yilgi tajriba sadaqa va qurbonlikni onlayn o‘tkazish mumkinligini ko‘rsatdi. Qurban-2021 sayti orqali sadaqa qilinadi hamda qurbonliklar uchun mablag‘lar o‘tkaziladi. Qurbonlikka atalgan jonivorlar Almati oblastining Qarasay rayonidagi maxsus maydonda so‘yiladi», — dedi Bekshin.

Uning aytishicha, barcha tadbirlar yuqori darajada o‘tkazilishi uchun din ishlari boshqarmasi va muftiy bilan qo‘shimcha uchrashuv o‘tkaziladi.

Bu yilgi Qurbon hayiti 20 iyulga to‘g‘ri keladi.

Avvalroq Rossiya musulmonlari diniy boshqarmasi ulamolar kengashi pandemiya sababli Moskvada Qurbon hayiti namozi onlayn o‘qilishi to‘g‘risida qaror chiqargandi.

O‘zbekistonda 2021 yilgi Qurbon hayiti munosabati bilan budjet tashkilotlarida ishlovchilar ketma-ket uch kun dam olishadi.

Prezident farmoniga asosan, 20–22 iyul (seshanba–payshanba) kunlari – ish haftasining turidan qat'i nazar, barcha xodimlar uchun dam olish kunlari hisoblanadi.