Rossiyaning Tojikistondagi harbiy bazasi yangi texnikalar bilan kuchaytiriladi

Iyul oxiriga qadar Rossiyaning Tojikistondagi harbiy bazasiga 17 dona modernizatsiya qilingan BMP-2M zirhli transporti keltiriladi. Bu haqda markaziy harbiy okrug qo‘mondoni Aleksandr Lapin ma'lum qildi.

Uning so‘zlariga ko‘ra, bu «harbiylarning jangovar imkoniyatlarini sezilarli darajada oshiradi».

Jangovar mashinalar 201-Rossiya harbiy bazasining motoo‘qchi bo‘linmalariga beriladi. Aniqlik kiritilishicha, yangi zirhli mashinalar eskilari o‘rniga keltiriladi. 

BMP-2M avtomatik o‘t ochish tizimi bilan jihozlangan. Unga panoramali mo‘ljalga olish va kuzatish uskunalari, R-168 «Akveduk» radiostansiyasi o‘rnatilgan.

Eslatib o‘tamiz, Afg‘onistondagi vaziyat keskinlashganidan so‘ng Rossiya harbiylari Tojikiston-Afg‘oniston chegarasidagi poligonga yetib keldi. Ma'lumot berilishicha, ular O‘zbekiston va Tojikiston harbiylari bilan qo‘shma mashg‘ulotlar o‘tkazadi.