Avgustdan emlangan sayyohlarga Saudiya Arabistoniga tashrif buyurishga ruxsat beriladi

Saudiya Arabistoni hukumati 1 avgustdan koronavirusga qarshi to‘liq emlangan xorijliklarga turistik vizalar bo‘yicha mamlakatga tashrif buyurishga ruxsat beradi. Buning uchun podshohlikda emlash uchun ma'qullangan 4ta - Moderna, Johnson & Johnson, AstraZeneca yoki Pfizer/BioNTech vaksinasidan biri bilan emlanganlik haqidagi sertifikatni taqdim qilish kerak.

Bundan tashqari, sayyohlar Saudiya Arabistoniga kelish oldidan 72 soatdan oshmagan vaqt ichida koronavirusga topshirilgan manfiy PsR-test taqdim qilishlari kerak bo‘ladi.

“1 avgustdan emlangan xorijliklarga turistik viza bo‘yicha podshohlikka kelishga ruxsat beriladi. Ular mamlakatga kelgach majburiy karantindan o‘tishlari kerak bo‘lmaydi”, deb aytilgan Saudiya Arabistoni turizm vazirligining Twitter’dagi xabarida.

Shu bilan birga, podshohlikda 1 avgustdan emlanmaganlarga ish joylariga va turli tadbirlarga tashrif buyurishga taqiqlov kiritiladi. Ta'kidlanishicha, koronavirusga qarshi emlangan bo‘lish tijoriy, madaniy, ko‘ngilochar, sport, iqtisodiy, ilmiy, ijtimoiy va boshqa tadbirlarga tashrif buyurish uchun zaruriy shart hisoblanadi.

Saudiya Arabistonida koronavirusga qarshi emlash 2020 yil dekabrida boshlangandi. Ayni vaqtda mamlakat aholisining 50 foizdan ko‘proq aholisi, ya'ni 26 mlndan ko‘proq fuqarosi vaksinaning kamida bitta dozasini olgan.

Saudiya Arabistoni 2019 yil sentyabrdan 2020 yil martigacha turistik vizalar bergan. Bu vaqt davomida ushbu vizani 400 ming kishi olgan. So‘ngra podshohlik hukumati pandemiya sababli viza berishni to‘xtatib qo‘ygandi.

Avvalroq 10 avgustdan boshlab xorijliklarga Umra ziyoratini amalga oshirishga ruxsat berilgani ma'lum qilingandi. Buning uchun ziyoratchilar podshohlikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan to‘liq emlangan bo‘lishi lozim.