Yaponiyada o‘zbek talabalarini tayyorlash uchun qo‘shimcha grant mablag‘lari ajratiladi

Qayd etilishicha, O‘zbekiston elchisi Muxsinxo‘ja Abdurahmonov Xirosima universiteti prezidenti Mitsuo Ochi bilan uchrashuv o‘tkazgan. Suhbat davomida Yaponiya universiteti va O‘zbekiston universitetlari o‘rtasidagi hamkorlikni kengaytirish masalalari muhokama qilingan.

Muzokaralar natijasida koronavirus bilan bog‘liq vaziyat barqarorlashganidan keyin Xirosima universiteti delegatsiyasining O‘zbekistonga amaliy safarini va sentabr oyida O‘zbekiston tibbiyot oliy ta'lim muassasalari talabalari uchun onlayn-ma'ruzalar tashkil etish, shuningdek, Yaponiyada o‘zbek talabalarini tayyorlash uchun qo‘shimcha grant mablag‘lari ajratish bo‘yicha kelishuvlarga erishildi.

Shuningdek, diplomatik missiya rahbari Xirosima universitetida tahsil olayotgan vatandoshlar bilan uchrashgani va talabalarning dissertatsiya mavzulari bilan tanishgani aytiladi.

«Yurtdoshlarimizga mamlakat rahbariyati chuqur bilimga, jumladan, o‘z mutaxassisligi va xorijiy tillarni mukammal egallagan yoshlarga katta umid bog‘layotgani, shuningdek, ularga O‘zbekistonda ishlash uchun barcha zarur shart-sharoitlarni yaratilishi ta'kidlandi», deyiladi ma'lumotda.